دولة سب دين مصر

يعني انا ح اعيش عبيطة واموت بريالة
ايه بقى؟
بقى انا لما ابتديت مع مينا مدونة الحوار
كان هدفنا احنا الاتنين اننا ننقذ العرب من شر قد اقترب
وان مش معقولة يعني يبقى مواطنين عايشين مع بعض في نفس البلد
وبيعانوا نفس المعاناة
وبدل ما يمسكوا في المتسبب في معاناتهم
ماسكين في شواشي بعض
ومش معقولة كل ما امريكا تفرقع بمب
المسلمين يجروا على المسيحيين المصريين اللي زيهم بالظبط
وينزلوا فيهم هبد ورقع عشان ينصروا الاسلام
ومش معقول المسيحيين على طول مقموصين ومنزويين
و

"طب والله ما انا مكلمكوا هه بس"
وفتحنا الموضوع ودخل معانا ناس امرا
وكل واحد طلع اللي في قلبه ومية مية
ولقيت ناس كتير بتقول انها بتحب البلد وعايزة هي كمان
تتعاون معانا
ماشي قشطة
وبقيت انا ومينا نفتح مواضيع قصدنا نصفي النفوس
لدرجة ان الناس اتخضت مننا وافتكرتنا اعداء
واحنا اصحاب وعايزين نفتح الجرح عشان نطهره
جميل؟
لقيت من ضمن الناس اللي اتشاركت معانا في الحوار
بنت لطيفة على مجموعة
Fij
اسمها مريانة: اميرة وسكرة وكلامها يتحط ع الجرح يطيب
ولسبب ما مينا كان بيتخنق منها
وانا شايفة انها اميرة يعني البنت ما عملتش حاجة
المهم قالت لي تعالي معانا في منتدى دولة ابناء مصر
دولة متخيلة: مصر زي ما بنتمناها
حب وتعايش بين مواطنيها
مساواة في الحقوق والواجبات بصرف النظر عن الدين
فل الفل..قوم رحت جري اشتركت في المنتدى
وقعدت شوية مشغولة بكام حاجة كده
وبعدين قلت ما ادخل على ابناء مصر واشوف اخبارهم
دخلت على دولة ابناء مصر المبنية على التعايش والمحبة
والديمقراطية والمساواة
ولقيت الديمقراطية عندهم لها انياب
وانياب مسنونة على المسلمين بالذات
وكأن الدولة المتخيلة
هي دولة قصاص وانتقام من المسلمين
لصالح المسيحيين

وكأن دستور الدولة: بس ربنا يقدرنا عليكوا يا ولاد الكلب

ح نطلعه على عنيكو
وعندها واد مجنون كده مسمي نفسه قوة الصليب
والظاهر انه كان بيحضر في كنيسة ابنوب
آه ابنوب ده صاحب زينب اختي
مرة جالنا وهو عنده اربع سنين وقال لزينب
- كان عندها خمس سنين –
النهاردة كنت في الكنيثة ومحمد اخد مننا الثبثي
ام زينب قالت له محمد مين يا حبيبي
قال لها محمد النبي بتاعكوا وذعوا علينا ثبثي
وبعدين النور قطع ومحمد ابو فاطنة اخد مننا الثبثي
ام زينب قالت له مين يا حبيبي اللي قال لك كده
قال لها ابونا
طبعا الكنائس في مصر زي الجوامع
يعني زي ما فيه مسجد بيتكلم عن المحبة والتسامح
في مصر الجديدة
فيه مسجد في فيصل بيتكلم عن عباد الصليب
والمسيحيات الغنائم
والنبي ما عارفة عايزة المسيحيات غنائم في ايه
ما احمد زي الحاج احمد
والمسيحية المصرية اللي ح يغتنمها
شبه المسلمة المصرية اللي هو راميها في البيت
يعني ما عندوش حتى رغبة في التجديد
واهو اهبل ومخه تعبان زي القسيس اللي بيقول لعيال
عندهم اربع سنين ان محمد ابو فاطنة اخد منهم الشيبسي
ومسيرهم يكبروا ويعرفوا انه كداب
وزي ما ده موجود فيه كنيسة تانية بتحضرها واحدة صاحبتي
القسيس قال لهم في الدرس: بدل ما اول ما يجي الادان في التلفزيون
فتقفلي او تحولي القناة..احنا مواعيد صلاتنا زي مواعيد المسلمين
وزي ما بتشوفيهم بيسيبوا كل حاجة في ايديهم ويقوموا يصلوا
انتوا كمان لما تسمعوا الادان قوموا صلوا
وعلموا ولادكوا الحب واتعلموا تحبوا
بدل ما تفضلوا طول الوقت ترثوا لحالكوا
لو حبيتوا الناس لانهم خليقة الله
الله ح يحبكوا والناس ح تحبكوا
اهو ده قسيس وده قسيس ودي كنيسة ودي كنيسة
زي ما دكهه شيخ ودكهمة شيخ
ودهون جامع ودوت جامع
وكل واحد وبخته والمنطقة بقى اللي ساكن فيها
والظاهر ان الاخ قوة الصليب اللي موجود في دولة ابناء مصر
بتاعة الانسة وللا السيدة مريانة
كان بيروح كنيسة شبه كنيسة ابنوب
والظاهر ان كيس الشيبسي حارقه لحد دلوقت
ما عندوش حاجة يتكلم فيها غير
ان سيدنا محمد راجل فاحش وسباب ولعان
ومدعي نبوة ولا ينفذ تعاليم الاسلام اللي هو جاء به
وسيد الخلق بتاع ايه ده
وكان ناقص يقول: هات كيس الشيبسي بتاعي يا حرامي
واحد تاني برضه اسمه جرجوري
بس الحقيقة ماعندوش مشكلة مع سيدنا محمد بالذات
هو عنده مشكلة مع الاسلام كله والمسلمين كلهم
عنده مشكلة بالذات مع عزير اللي هو مصمم يسميه
عمو عزيز بتاع اليهود
والست مريانة بتاعة الدولة والتعايش
وصلت واحد من الرعايا
- اللي هو بالمناسبة ملحد –
انه يقول يا اخوانا انا ملحد بس ما ينفعش سب الدين
على طول على طول للمسلمين كده
والغريبة ان يا عيني المسلمين اول مرة يبقوا ياعيني بجد
يعني حاجة ياعيني يا عيني خالص
عمالين يردوا من هنا ومن هنا
وانا مش فاهمة بيردوا على ايه
يعني اللي انا افهمه في التعايش
ان الدين لله والوطن للجميع
وان كل انسان عليه ان يحترم عقيدة الاخر
وانه لا يجادل الا بالتي هي احسن
معلش رسولي السباب الفحاش اللعان
اللي بياخد اكياس الشيبسي من العيال
هو اللي علمني كده
طيب يا اخت مريانة فين التعايش ده
فين الديمقراطية دي
خصوصا ان لما واحد من مواطنين دولة
سب دين مصر بتاعتك
نزل قرآن في قسم الفنون بصوت مقرئ
معروف ان صوته حلو
حمرتي له عينك وبرقتي له
وقلتي له: ايه ده ايه ده
احنا بقى ح نقلب الدولة لدولة دينية
وح تروج لي للاسلام هنا؟
ولما قال لك فين الترويج ده قرآن
والحقيقة يا سيدة مريانة القرآن مش غريب عليكي
انت مصرية يعني اكيد سمعتيه على الاقل وانت ماشية
في الشارع
قلتي له مافيش مسيحي بينزل اجزاء من الانجيل على الدولة هنا
ياختي يا ريت
يا ريت
خليهم ينزلوا ايات من الانجيل
بالذات احبوا اعداءكم
باركوا لاعنيكم
خليهم ينزلوا صلوات محبة
يمكن تشيل السواد اللي جوا الاخ اللي مسمي نفسه
قوة الصليب ده والتاني جرجوري اللي شاغله قوي
عزير اللي قراها عزيز
الحقيقة انا اكتر حاجة اكرهها في حياتي اني اتاكل على قفايا
يعني انا دلوقت
ودلوقت بس
احترمت موقع الاقباط المتحدين
لانهم صرحا وواضحين
ما بيدعوش انهم عاملين دولة الكترونية
للتعايش والمحبة والديمقراطية
وهم عاملين موقع طائفي ينشروا فيه غلهم
وامراضهم بدل ما يعالجوها
انا قريت اربع مواضيع لقوة الصليب
وهي تقريبا كل المواضيع اللي هو كاتبها
ومش كاتب في اي موضوع غير عن سيدنا محمد
لدرجة اني حسيت انه وهو صغير واحد مسلم اسمه محمد
اغتصبه
وقرر ينتقم من كل اللي اسمهم محمد
وعلى رأسهم بقى كبير المحمدات
وكام موضوع للواد الشرشوح اللي اسمه جرجوري
اللي ما بيعملش حاجة غير يشتم وبس
والله ما فاكرة قال ايه من كتر ما كلامه تافه
المهم انا قريت المواضيع دي من هنا
وحسيت ان الخزوق اتقلوظ واتظبط
واخدته شنيور محترم
لقيت نفسي عضوة في منتدى
بيحض على الكراهية والطائفية
واهانة المقدسات في اتجاه واحد
منتدى معظم اللي فيه يا اما مرضى بالكراهية
والحقد الطائفي
يا اما عبط وجالهم التهاب رئوي من الريالة
اللي نازلة على صدرهم
وانا على رأس النوع التاني طبعا
ما شفتش قدامي بقى
بعت رسالة خاصة للاخت مريانة
مش فاكرة والنبي قلت ايه
بس فاكرة اني شتمت كتير قوي
انا كده
اللي يستكردني احس اني عايزة اشرب من دمه
اكتر حاجة اكرهها في حياتي الادعاء والغش
والتدليس
انا عمري ما دخلت على الاقباط المتحدين
ولا على اي موقع سلفي بيشتم
"عباد الصليب"
وشتمتهم
لانهم مش غشاشين ولا مدلسين
لكن انا ما احبش احس اني
.....اتقرّصت....مشيها اتقرّصت
والاخت مريانة قرّصتني
وقرطصتني
وانا عادة بعد ما باشتم اللي بيعمل فيا كده
بارجع
مش من الغيظ
من القرف والاحتقار
لينكات دولة بعابيص مصر
اهيه
معلش اصلي قليلة الادب
ما انا مسلمة بقى
اتفضلوا
اقروا بنفسكوا

ويا ريت ما تقروش نص الموضوع بس

ارجو قراءة الحوارات التي دارت بين اعضاء المنتدى

http://forum.sonsofegypt.net/t601.html

http://forum.sonsofegypt.net/t625.html

http://forum.sonsofegypt.net/t859.html

http://forum.sonsofegypt.net/t658.html

http://forum.sonsofegypt.net/t639.html

ماريو وأندرو وفانوس الإسلام السحري... آه يا بلد النفاق في دمك!

أنقل إليكم هذا المقال كما هو من الأقباط متحدون دون تعليق مني سوى إن البلد بتتحرق يا بشر وماتش الكورة بين المسيحيين والمسلمين مش هيتهي بأجوان هنا وأجوان هناك... الماتش هينتهي بخراب غير مسبوق في تاريخ مصر.

-----

ماريو وأندرو والفانوس السحري

26/07/2007

ماريو وأندرو اللذان تريد وزارة التربية والتعليم أن تجبرهما على أداء الامتحان في الدين الإسلامي أصبحوا أشهر طفلين الآن على الساحة الإعلامية في مصر تتناقل أخبار هما البرامج والمنتديات بين مؤيد لموقفهم حتى من الكثير من المسلمين الذين شهدوا شهادة حق وأيدوا موقف الطفلين وأكدوا احترامهم لرغبتهما وقالوا أن إجبار هذان الطفلين على ترك دينهم هو أكبر إساءة لدينهم
ولكن هناك عدد لا يستهان به فاقد للفهم والوعي ويعيش في غيبوبة أن الطفل يولد على فطرة الإسلام وأن الدين عند الله الإسلام ولذلك إن أعتنق أحد الأبوين لابد أن يتبعه أولاده سواء كان هذا الأب أو الأم و هذه الفئة لاعنة الأم لأنها متعصبة على حد رأيهم وتقوي أولادها وتعصيهم وتحرضهم على التمرد على ما سوف يضمن لهم الخير في الدنيا والآخرة وكأنها كان يجب أن تقول لأولادها عيب يا أولاد لابد أن تبقوا مسلمين مثل بابا وأتركوا دينكم اللي تربيتما عليه وقبلتاه لأنه لن يسبب لكم غير المشاكل والاضطهاد
وإن سئلت المؤيد لجبر أندرو وماريو على أن يتحولوا لمسلمين غصباً عن إرادتهما هل تقبل أن يحدث هذا لأولادك إن اعتنق زوجك أو زوجتك المسيحية ؟
سوف يقول لك لا طبعاً فالوضع هنا مختلف فالإسلام هو أفضل دين و لابد أن يتبعا الأولاد الدين الأفضل وبالطبع من وجهة نظرهم هم فقط الإسلام هو الأفضل فهم فقط خير الناس وأفضل الأمم وهذه نرجسية بعيدة عن الواقع لأنهم لو واثقين أنهم الأفضل والأخير ما كانوا وضعوا قانون الردة خوفاً من خروج أتباعهم من هذا الدين، ماريو وأندرو هم أكبر شاهدان على ما يلاقيه الأقباط في مصر من ........ ضعوا أنتم الكلمة المناسبة اضطهاد أو تعسف أو تمييز ضدهم أو غيرها من المسميات، ماريو وأندرو يقفان ضد قوانين وإجراءات ظالمة اتخذها والدهم ضدهم لأنه يحمل الفانوس السحري القادر على فعل أي شيء في هذه البلد هذا الفانوس السحري هو أنه أصبح مسلم و ما أعجب قدرة هذا الفانوس السحري أنه قادر أن يفعل العجب في بلاد العجائب فكما زوج الفانوس السحري القاصرات القبطيات قبلاً ضارباً بالقانون عرض الحائط فأنه قادر على فعل الكثير للأب!!!
الفانوس السحري سوف يسقط كل القضايا الجنائية والمدنية عنه لأن الإسلام يلغي ما قبله!!!
الفانوس السحري سوف يعفيه من الإنفاق على أولاده لأنهم يعيشوا مع أمهم الكافرة!!!
الفانوس السحري سمح له أن يحول أولاده لمسلمين غصب عن إرادتهما بمجرد أن طلب هذا!!
الفانوس السحري جعل وزارة التربية والتعليم بأكملها تقف ضد إرادة طفلين في أن يكونا مسيحيين وتريد أن تجبرهم وتقهرهم على أداء الامتحان في الدين الإسلامي العظيم الذي سمعنا عنه ملئ الأذن!!!
أنه ليس في حاجة إلى أحد فلما تجبروا أذن طفلين عن التحول إلى الإسلام لما تسمحوا بقهرهم على أن يكونا مسلمين ؟ هل هذه هي السماحة والعدل ؟
ومن عجب العجاب أن الدولة التي أعطت لأبيهم الحق في تغيير دينه بكل يسر وسهولة وربما غيّر بطاقته وأوراقه في زمن قياسي يحسده عليه أي مسلم أو مسيحي يريد أن يصحح خطأ في أسمه أو ديانته في بطاقته أو شهادة ميلاده تقف ضد رغبة طفلين أن يظلا على دينهم
الدولة التي ربما أسقطت عنه قضايا شيكات أو نصب أو خلافه فعلها قبل التحول إلى الإسلام تقف أمام طفلين كل ذنبهم أنهما يريدون أن يبقوا على دينهم الذي ولدوا عليه ولن يرضوا بغيره وهذا حقهم، إلى متى نظل نطالب بأبسط حقوق الإنسان وهو اختيار دينه وعقيدته ؟
إلى متى يظل القانون يميز بين المصريين على حسب دينهم ؟
إلى متى نظل ندور في هذه الدائرة المفرغة ؟
من الواضح إنه لا خروج دوامة التعصب والطائفية قريباً لأنها تلهي الناس عن الفساد الذي استوحش لقد أعطوا الشعب التعصب والهوس الديني كأفيون يخدرون بها أنفسهم ويلهو به بعيداُ عنهم ولا يفكرون في مشاكلهم ومصائبهم التي انضم إليها مؤخراً البحت عن جرعة ماء تسد عطشهم في عز الصيف.....
أخيراً هل تقبل منى الشاذلي أو الدكتورة سعاد صالح أو الأخوات المتصلات أن يجبروا أولادهم على أداء الامتحان في الدين المسيحي واعتباراه نصوص أو فيزياء أو كيمياء لحل المشكلة أم أنهن يشرعن إجبار الطفلين وإكراهم ؟؟! لا أدري لما تذكرت الحديث الإسلامي الذي يقول عن النساء أنهن ناقصات عقل ودين وأنا أستمع لأراء السيدات في برنامج العاشرة مساءً بما فيهن مقدمة البرنامج، لأول مرة أسمع منك كلام عاقل متزن من جمال أسعد في إتصاله على برنامج العاشرة مساءً لأول مرة يا أسعد تشهد كلمة حق أتمنى أن تستمر على هذا فالحق مذاقه لذيذ وأتمنى أن يعجبك مذاقه فتستمر عليه ولا ترجع للخرنوب مرة أخرى.
إلى أم الطفلين لما لم تهربي بأولادك داخل مصر أو خارج مصر فور اعتناق زوجك الإسلام ؟ هل كنت تتوهمين أنك سوف تحصلي على حقوقك منه كالنفقة وخلافه بعد إسلامه ؟ لما دخلت معه في قضايا سابقة عن قضايا الطفلين ؟ هل كان بعيد عن ذهنك أنه يحمل فانوس سحري بإسلامه يجعله يسلبك كل حقوقك بما فيها أولادك ؟
إلى أندرو وماريو أنكم سوف تخرجون من هذه المحنة أبطال ورجال يضرب بكم المثل في عظمة وقوة الإيمان وإن كان الله معكم فمن عليكم
جورج فايق
George_faik@hotmail.com

رسالة بقت بوست

الرسالة دي كتبتها على

fij

وسنجفتها وعملتها بوست

انا حرة

===

طبعا انا ما عنديش الجرأة اللي عند بعض الناس

اني افتي في الدين

لكن انا اخدت برأي العلماء الاجلاء اللي بيقولوا

ان مافيش حاجة اسمها حد ردة

وان الخلط ما بين حروب الردة اللي هي كانت حروب

ضد انفصاليين بيهددوا امن الدولة

وبين حد الردة المقام على الافراد خلط مخل

والله انا سني كبر يا ولادي

ونسيت اسماء العلماء اللي كتبوا كتب في الموضوع

ده

لكن اللي فاكراه

ان
حد الردة ده اختراع اموي
مافيش حد ردة اساسا
لا بنص القرآن ولا صحيح السنة
وبعدين هو ربنا مدينا مخ وللا مهلبية
يعني ربنا يقول من شاء فليؤمن ومن شاء فليكفر
وبعدين اللي يكفر يتقتل
يعني بيعمل للناس فخ مثلا والعياذ بالله؟
ولما سئل عمر بن الخطاب عن مدة استتابة المرتد
قال الى آخر عمره..ما يدريك لعل الله أن يهديه
والاستتابة طبعا مش انك تكبس على نفسه لحد ما تخليه هو ينتحر بدل ما انت تقتله
ولكن بالحكمة والموعظة الحسنة والجدل بالتي هي احسن
واساسا بني امية دول اتهموا كل الناس بالكفر والنفاق
حتى سيدنا الحسين
امال هم استحلوا دم الحسين ليه؟ عشان يزيد كان بيقول عليه منافق ومرتد
هئ هئ هئ

والرسول ارتد في عهده عبيد الله بن جحش

وما عملوش حاجة بس امر بتفريقه من مراته المسلمة

واحد يقول لي ده كان في الحبشة وفي الفترة المكية

طيب في عهد الرسول في المدينة

ناس ارتدوا وما عملهمش حاجة

ولا حتى طردهم بس هم ما طاقوش يقعدوا

مع الناس اللي هم بيكرههوهم قام مشيوا

والرسول قال: المدينة تطرد خبثها

او كما قال
ده بس توضيح يعني عشان اصحاب مبدأ: دخول الإسلام مش زي خروجه
على رأي اللي قالت: ده فقه المراحيض
===
النقطة التانية
اي تغيير في الدين في المجتمع المصري بيعامل بحساسية

الحقيقة هو بيعامل بجنان
ويتساوى في ذلك المسلمين والمسيحيين
وعادة الحكومة ما بتتدخلش
واللي اهله بيجروا وراه عشان يموتوه الامن بيقول لهم انا ماليش دعوة
والله حصلت فعلا مع اتنين انا اعرفهم
بس الموضوع بتاع العائدين للمسيحية كبر عشان حكاية السجق المدني وساقط خيط والكلام ده

وعشان هم فعلا ما غيروش دينهم

بس اللي بيغير دينه عن اقتناع

سواء للاسلام او المسيحية بيطلع تلاتين اللي جابوه

مرة الامن قال لواحد راح يشتكي اهله انهم عايزين

يقتلوه: انا مش ح ابقى احن عليك من اهلك

وبعدين انت ايه اللي يخليك تغير دينك اللي كبرت عليه

مع العلم ان الظابط اللي قال له كده ينتمي الى الدين

اللي الولد غيره له مش منه

فيه ناس كتير غيرت دينها
من دول او من دول
وما عرفوش يغيروا ورقهم
عشان الامن بيتدخل وبيقول ما تعملولناش مشاكل
المشكلة ان ناس كتير بتتعامل بمبدأ الاهلي والزمالك اللي مينا بيقول عليه
يعني مثلا
كرد فعل لقضية العائدين للمسيحية
وبصراحة انا شايفة ان اللي منهم غير دينه عشان الطلاق او الشيكات ده
لا كان في الاسلام ولا عاد للمسيحية
يعني ده واحد بيلعب مع ربنا
لكن انا باتكلم على اللي اتكتب مسلم غصبانية واقتدار عشان ابوه اسلم
مع ان المفروض والمؤكد برضه في صحيح السنة
ان اللي اتولد في عائلة مسلمة لما يبلغ العقل يجدد ايمانه
لكن كرد فعل للقضية دي
احمد الجيزاوي عمل قضية المسيحيين اللي اسلموا وبيطاردوا هم كمان
طبعا احمد عملها برضه بفكرة الاجوان
ولما اتكلمت معاه قال لي: لا انا ما عملتهاش كده
بس مدام فيه ناس اخدت حقها من المسيحيين كمان انا بادور على حق الناس دول
دي فرصة
ايا كانت دوافعه
لكن بقى ردود افعال المسيحيين على بوست احمد كان شبه ردود افعال المسلمين على قضية المسيحيين اللي اتكتبوا مسلمين
غصبانية واقتدار
الحقيقة كانت هي هي
مش شبهها بس
بالظبط بالظبط
فولة وانقسمت نصين
لما حطيت صوابعي العشرة في الشق
الوحدة الوطنية غلبتني
واكبر دليل على الوحدة الوطنية ان المسلمين والمسيحيين بيعملوا نفس ردود الافعال
بنفس البنطلون بنفس الفانلة
وبيزعلوا من نفس الحاجات اللي مش منطقي انهم يزعلوا منها
بنفس البنطلون بنفس الفانلة
يعني س او صاد مسلم او مسيحي
مقتنع ان دينه صح
من حقه
بس من حق غيره كمان انه يقتنع ان دين تاني هو اللي صح
والصح والغلط نسبي بشكل فردي جدا
كل واحد ودماغه وظروفه وتركيبته النفسية
يعني مش لازم يبقى المسلم اللي اتنصر واخد فلوس من امريكا
ولا لازم المسيحي اللي اسلم يبقى اتخطف وشربوه حاجة اصفرا عشان يغير دينه
والبني ادم المؤمن فعلا لا بيتأثر بفلوس ولا بيخاف من خطف
ده اذا كانت الحاجات دي بتحصل اساسا
ولا داخلة دماغي ولا باكل منها
يعني استغلال فقر الناس في الاماكن العشوائية بيحصل صحيح
من جوانب عدة
مش من مسيحيين او مسلمين او جهات اجنبية
بس
من كل الناس
وفيه ناس بتعمل عمل خيري ما فيهوش استغلال
لكن اجيب واحد قد البغل بيشتغل وزي الفل ودماغه توزن بلد واقول ده اتنصر عشان اخد من امريكا نص مليون جنيه
هئ هئ هئ هئ
ده عند ام لالو
اجيب شحطة واقول عليها اسلمت عشان اتخطفت وهي اساسا اللي خطفها لو شالها ضهره ح يتقطم
هو احنا في قندهار هنا
خطف ايه وفلوس ايه ونيلة ايه
كل واحد رافض يعترف ان فيه غيره اقتنع بدين تاني
وشايف انه لو اعترف ح تبقى اهانة
لا مش اهانة
ومش لازم تدور ورا البني ادم اللي غير دينه عشان تعرف هو غير دينه ليه
الا اذا كنت شاكك في دينك وايمانك ضعيف واي حد يغير دينه تتهز وتحاول تبرر لنفسك باي حجة عبيطة
من حق البني ادم انه يفكر ويقرا ويراجع ثوابته
والامام ابو حامد الغزالي قال: من لم يشك فلم يؤمن
والرسول قال: نحن اولى بالشك من ابراهيم
يعني ده حث من الرسول على ان الواحد يراجع ايمانياته
وكل فترة يراجع افكاره
ولازم من آن لآخر يدلق كل اللي في دماغه عشان يعرف ينضفه
ويرمي اللي مالوش لازمة ويعيد اكتشاف اللي كان موجود وهو ناسيه

وفيه مقولة مش متذكرة دي اثر وللا حديث: الشك عين الايمان
وده من حق الانسان
اي انسان
ومن حقه يختار الدين اللي هو عايزه
لكن اعمل زي كوندوليزا واقول: لك حرية الاختيار انك تختار اللي انا عايزاك تختاره
ولو مش كده يبقى ح اطلع ميتين اللي جابك؟
طيب لو هي كده بقى قولوا لنا عشان نعمل حسابنا
من الاخر بقى وعلى مية بيضا

ما حدش بيخاف من ان الناس تفكر

وشاغل نفسه بانه يبرر تغيير الدين

بان ده عميل او ده مخطوف

الا ضعيف الايمان

اللي مش مصدق ان دينه صح

وبيحاول يقنع نفسه

ولما غيره ما بيقتنعش بيتهز

ويخاف

لو صحيح جواك ايمان حقيقي

ما تخافش على دينك لو شايفه صح

وما تخافش من ان واحد شاف له دين

في عقيدة تانية

وبدل ما تقعد تقول دي امريكا مجنداهم

ده المتطرفين خاطفينهم

بص لنفسك بقى في المراية

وتعالى هنا وقول لي

انت مش مقتنع بدينك ليه؟

ولو مش مقتنع

مش بتحاول تدور على الحقيقة ليه؟

مش يمكن جواك وانت مش لاقيها؟

الحقيقة مش في اسلام مريانة

ولا تنصر فاطمة

الحقيقة جواك انت

سيب الناس في حالهم

آدي عينة من الزبالة اللي بتيجي ع الإيميل

يا ريت أمات دقون من الناحيتين يروح يناموا بقى ويتغطوا كويس ويبطلوا يبوسوا في دقون بعض واللي في القلب في القلب

بكل أسف... المسلمين والمسيحيين بيكرهوا بعض كره العمى

بكل أسف المصريين عندهم هوس وحساسية مفزعة من تغيير المرء لدينه أو حتى لمذهبه تصل إلى حد الهطل
المسيحيين خايفين ومرعوبين من المسلمين اللي هيخطفوا بناتهم ويسقوهم حاجات أصفرة يناموا بيها مع شباب مسلمين وبالتالي يسلموا عشان يداروا الفضيحة
والمسلمين خايفين من وهم مؤامرة هطلة زرعها في دماغهم واحد اسمه محمد عمارة اسمها المؤامرة التنصيرية الصليبية
وبين هطل المسيحيين المذعورين والمسلمين المفزوعين تنداس بالجزم حرية الاعتقاد وحرية تغيير الدين وحرية الدعوة للدين والاعتقاد في حدود عدم الإجبار والإكراه

هاقولها للمرة الألف من حق المسلم أن يمارس دعوته الإسلامية لغير المسلمين بكل حرية ولكن دون إجبار أو إكراه
ومن حق المسيحي أن يبشر بإيمانه لغير المسيحيين بكل حرية وأيضا دون إجبار أو إكراه

مفيش حاجة إسمها حرية تغيير الدين في اتجاه واحد أو حرية الاعتقاد في اتجاه واحد أو حرية الدعوة في اتجاه واحد

إما حريات حقيقية وحقوق إنسان كاملة أو روحوا موتوا بقى

وآدي عينة على ادمغة البشر في بلادنا...

كارثة التنصير في مصر

السلام عليكم ورحمة الله وبركاته

وصلتني هذه الرسالة علي الايميل فارجو المساعدة

اخي/اختى في الاسلام ... جعلك الله نصرا لدينه

ارجو منك اخى/اختى فى الله ان تقوم ببذل اقصى جهدك لحث المسلمين النائمين عن

جهود التنصير في جمهورية مصر العربيه


لقد نجحوا في جزيرة الدهب بين المعادي ومنطقة البحر الأعظم وتقريبا تنصرت

الجزيرة وبها كنيسه كبيرة جدا الأن .


والأن الدور على عدة أماكن اخرى أعرف منها منطقة الكيلو 4.5 في القاهرة

على اطراف مدينة نصر على اول طريق القاهرة السويس


اخواننا المسلمين جائعين وعرايا ولا يملكون الطعام او الملبس او العلاج وهنا

يبرز رجل الكنيسة ) الطيب( في خطة مرسومه على مستوى مصر كلها

)ويقول لهم تعالوا كل يوم إلى الكنيسه

لتأخذوا ما يرسله لكم المسيح


ويرتبط الناس بالكنيسه ويذهبوا إليها هم واولادهم يوميا ليأكلوا ويتلقوا
العلاج

ويجدوا الملبس وبدلا من ان يكون المسجد قبلتهم تصبح ا لكنيسه



انا لا ابكى عليهم "فمن كفر فعليه كفره" أما من يتقطر قلبي عليه دما وحزنا
هو

الاولاد الصغار الذي يتم تنصيرهم


أن الغرض من هذا هو محاولة تغيير التركيبه السكانية في مصر لتعود لصالح

النصارى كما كانت حتى 700 عام مضت

.. والكنيسة تعلم تماما ان من يأتي لها لا يفرق بين

الصليب و الكعبة ولا يهمه ما تكون قبلته ..

والمهم ان يأكل فهو لم يكن مسلم ملتزم حتى يصبح نصراني ملتزم أما الاساس هو
ليس

اولاده بل اولاد اولاده الذين سيصبحون نصارى مخلصين


وتذكروا ماحدث في الاندلس المغتصبة . والتي تسمى الأن .... أسبانيا ....

أن المسلمين فيها الأن لا يتجاوزوا المائة الف مسلم وسط ملايين النصارى ..

في بلاد كانت من اقوى بلاد المسلمين حتى 500 عام مرت فقط


أن المطلوب هو ان يساهم كل من مسلم بجهده في انقاذ أهل هذه المنطقه


ان كنت تعرف جمعية خيريه فوجهها لهذه المنطقة لتساعد المسلمين بدلا من
الكنيسه


ان كنت لا تعرف فأجمع من اصدقائك مبلغا شهريا وساعد به اسرة واحدة حتى ..
واذهب

إلى هناك وانتقى من حالات الفقر ما تشتهي .... ولا حول ولا

قوة إلا بالله


أن كان لا هذا ولا ذاك فأنشر في اصدقائك ومعارفك ما يحدث لعل المسلمين

يفيقوا ...... أضعف الايمان مرر هذه الرسالة إلى اصدقائك


هذا ما باليد ولا حول ولا قوة الا بالله العلى العظيم

نحو قرأة جديدة لجذور الازمة الطائفيةفي مصر...الجزء الاول

ان المسيحين في مصر قد اختاروا ودون وعي العزل داخل جيتو لا يدخله الا هم...لاحظوهم في الجامعة...هناك مكان معروف لهم في كليتي علي سبيل المثال...في العمل ...في النوادي...
وكانه لا يكفيهم مدارس الاحد والحياة الشبه كاملة داخل الكنيسة...
ما الذي حدث؟
الذي حدث هو انقلاب علي العلاقة ما بين الاسلام والمسيحية
متي بدأ؟
بالنظر الي الخريطة السياسية و بالبحث عن بدا اختفاء المسيحيين المصريين من الحياة السياسية و الاجتماعية
نجد ان المع الفترات في التقارب ما بين شطري الامة المصرية كانت في العهد الليبرالي الوفدي ما بين 1919-1950
و لا ادل علي ذلك من تقرير لجنة ملنر والذي جاء في نصه
(لم اجد مسلمين ومسيحين بل وجدت مصريين يذهبون للجامع واخرين للكنيسة)
اذا ليست المشكلة هنا
ننتقل للحقبة الناصرية
1954- 1970
في هذه الحقبة انتقل المشروع الليبرالي الي المشروع الناصري
الاشتراكي
و هنا بالتاكيد ليست المشكلة
حيث توحد حلم المسلمين و المسيحين الي حلم الوحدة العربية
و صحوا معا علي كابوس الهزيمة في 67
بل وعادوا جنبا الي جنب معا علي خط النار
اذا متي بدات الفتنة النائمة؟
لقد دخل علي المسرح ثلاثةلاعبين اقوياء
عبد الحليم محمود...شيخ الازهر
نظير جيد روفئيل-انطونيوس السرياني –البابا شنودة الثالث
محمد انور السادات

ولنبدا بالاول وهو الامام المرحوم عبد الحليم محمود و الذي كان معروف كونه صوفيا..لذا فعلاقته بالمسيحين ستكون افضل من غيره...لكن اول صدام لهذا الرجل كان عندما دعا البابا شنودة الي اصدار كتب دين موحدة يدرسها تلاميذ المدارس جميعا...
فاعترض الامام ووجه لوما شديدا لمصطفي كمال حلمي وزير التعليم انذاك...
هذا الرجل الذي وقف في وجه السادات دون ان يهابه قوته وجبروته ابان الاصدار الثاني لقانون الازهر و الذي كان يجرد شيخ الازهر من باقي صلاحياته بعد ان تم تجريده من الكثير منها ايام الامام محمود شلتوت...
لذا حدث تصادم ما بين الامام و السادات علي اثره قدم الامام اسقالته التي هزت ارجاء العالم الاسلامي ما حبا بالسادات للتراجع عن مشروع القانون....
لكن المشكلة الحقيقية بين المسلمين والمسيحين كانت بين اللاعبين الاقوي في مصر السادات وشنودة
بدأ الصراع عندما تولي شنودة الكرسي الباباوي...اول صدام كان عام 1972 بالخانكة عندما قامت الكنيسة بانشاء كنيس دون اذن او تصريح قام مجهولون باحراقها...وضع تحت مجهولين الف خط
فخرجت مسيرة يقودها شنودة و بعض الرهبان.......
ثم الصدام الثاني برفض البابا ارسال حجاج الي القدس ما بعد
اتفاقية كامب دافيد ما وضع السادات في حرج بالغ
ثم كانت الطامة الكبري بحادث الزاوية الحمراء عام 1980
والذي علي اثره نتج 17 قتيلا و 112 جريح
و علي اثره تم عزل البابا شنودة الي وادي النطرون
انا هنا لا أأرخ للاحداث الطائفية ولكنها محاولة لبحث جذور الزمة الحالية
السادات يتحمل ايضل جزءا كبيرا
فكما سيس البابا ملف الاقباط في مصر وعزلهم عن باقي المجتمع
و هو ما لم يكن موجود قبله
قام السادات بفتح الابواب علي مصراعيها لتيارات العنف المسلح
زاعما انها دولة العلم والايمان......يتبع