Thursday, July 5, 2007

آدي عينة من الزبالة اللي بتيجي ع الإيميل

يا ريت أمات دقون من الناحيتين يروح يناموا بقى ويتغطوا كويس ويبطلوا يبوسوا في دقون بعض واللي في القلب في القلب

بكل أسف... المسلمين والمسيحيين بيكرهوا بعض كره العمى

بكل أسف المصريين عندهم هوس وحساسية مفزعة من تغيير المرء لدينه أو حتى لمذهبه تصل إلى حد الهطل
المسيحيين خايفين ومرعوبين من المسلمين اللي هيخطفوا بناتهم ويسقوهم حاجات أصفرة يناموا بيها مع شباب مسلمين وبالتالي يسلموا عشان يداروا الفضيحة
والمسلمين خايفين من وهم مؤامرة هطلة زرعها في دماغهم واحد اسمه محمد عمارة اسمها المؤامرة التنصيرية الصليبية
وبين هطل المسيحيين المذعورين والمسلمين المفزوعين تنداس بالجزم حرية الاعتقاد وحرية تغيير الدين وحرية الدعوة للدين والاعتقاد في حدود عدم الإجبار والإكراه

هاقولها للمرة الألف من حق المسلم أن يمارس دعوته الإسلامية لغير المسلمين بكل حرية ولكن دون إجبار أو إكراه
ومن حق المسيحي أن يبشر بإيمانه لغير المسيحيين بكل حرية وأيضا دون إجبار أو إكراه

مفيش حاجة إسمها حرية تغيير الدين في اتجاه واحد أو حرية الاعتقاد في اتجاه واحد أو حرية الدعوة في اتجاه واحد

إما حريات حقيقية وحقوق إنسان كاملة أو روحوا موتوا بقى

وآدي عينة على ادمغة البشر في بلادنا...

كارثة التنصير في مصر

السلام عليكم ورحمة الله وبركاته

وصلتني هذه الرسالة علي الايميل فارجو المساعدة

اخي/اختى في الاسلام ... جعلك الله نصرا لدينه

ارجو منك اخى/اختى فى الله ان تقوم ببذل اقصى جهدك لحث المسلمين النائمين عن

جهود التنصير في جمهورية مصر العربيه


لقد نجحوا في جزيرة الدهب بين المعادي ومنطقة البحر الأعظم وتقريبا تنصرت

الجزيرة وبها كنيسه كبيرة جدا الأن .


والأن الدور على عدة أماكن اخرى أعرف منها منطقة الكيلو 4.5 في القاهرة

على اطراف مدينة نصر على اول طريق القاهرة السويس


اخواننا المسلمين جائعين وعرايا ولا يملكون الطعام او الملبس او العلاج وهنا

يبرز رجل الكنيسة ) الطيب( في خطة مرسومه على مستوى مصر كلها

)
ويقول لهم تعالوا كل يوم إلى الكنيسه

لتأخذوا ما يرسله لكم المسيح


ويرتبط الناس بالكنيسه ويذهبوا إليها هم واولادهم يوميا ليأكلوا ويتلقوا
العلاج

ويجدوا الملبس وبدلا من ان يكون المسجد قبلتهم تصبح ا لكنيسه



انا لا ابكى عليهم "فمن كفر فعليه كفره" أما من يتقطر قلبي عليه دما وحزنا
هو

الاولاد الصغار الذي يتم تنصيرهم


أن الغرض من هذا هو محاولة تغيير التركيبه السكانية في مصر لتعود لصالح

النصارى كما كانت حتى 700 عام مضت

..
والكنيسة تعلم تماما ان من يأتي لها لا يفرق بين

الصليب و الكعبة ولا يهمه ما تكون قبلته ..

والمهم ان يأكل فهو لم يكن مسلم ملتزم حتى يصبح نصراني ملتزم أما الاساس هو
ليس

اولاده بل اولاد اولاده الذين سيصبحون نصارى مخلصين


وتذكروا ماحدث في الاندلس المغتصبة . والتي تسمى الأن .... أسبانيا ....

أن المسلمين فيها الأن لا يتجاوزوا المائة الف مسلم وسط ملايين النصارى ..

في بلاد كانت من اقوى بلاد المسلمين حتى 500 عام مرت فقط


أن المطلوب هو ان يساهم كل من مسلم بجهده في انقاذ أهل هذه المنطقه


ان كنت تعرف جمعية خيريه فوجهها لهذه المنطقة لتساعد المسلمين بدلا من
الكنيسه


ان كنت لا تعرف فأجمع من اصدقائك مبلغا شهريا وساعد به اسرة واحدة حتى ..
واذهب

إلى هناك وانتقى من حالات الفقر ما تشتهي .... ولا حول ولا

قوة إلا بالله


أن كان لا هذا ولا ذاك فأنشر في اصدقائك ومعارفك ما يحدث لعل المسلمين

يفيقوا ...... أضعف الايمان مرر هذه الرسالة إلى اصدقائك


هذا ما باليد ولا حول ولا قوة الا بالله العلى العظيم


15 comments:

karakib said...

يا دي الخيبة
وصلتني انا كمان
و قعدت اضحك لحد ما وقعت علي قفايا

جبهة التهييس الشعبية said...

هئ هئ هئ

والنبي يا مينا انت عجيب

انت مش بتقول ان الدعوة الى الافكار حق من حقوق الانسان؟

وان مافيش قانون يمنع التبشير؟

طيب مافيش قانون برضه يمنع المسلمين انهم يقولوا الكلام ده

هم شايفين ناس مسيحيين بيدعوا لدينهم

وسط الفقرا

اللي لا يمتلكوا ادنى مقومات الحياة الانسانية

والمسلمين بدورهم شايفين انهم من حقهم هم كمان يروحوا يلحقوا الناس الفقرا دول

ويثبتوهم على دينهم

ومافيش قانون يمنعهم من ده

وروحوا بقى انتوا الاتنين

باسم حقوق الانسان

كل واحد فيكوا يشد الفقرا من ناحية

وللا انت عايز حق الدعوة للفكر تبقى لصالح دين واحد؟

ومش من حق المسلمين انهم يروحوا هم كمان ويستغلوا فقر الناس ويدعوهم لدينهم

مدام قبلت ان دول يروحوا يروجوا لدينهم من خلال المساعدات الخيرية

يبقى في المقابل بقى من حق المسلمين ياخدوا زادهم وزوادهم ويشدوا سكان المناطق دي من ايد الكنيسة بالاعمال الخيرية

مش بس كده


ده من حق مرشحين الحزب الوطني انهم يدوا لسكان المناطق دي وجبة وعشرين جنيه عشان يروحوا ينتخبوهم

وبعدين ترجع تقول المسيحيين والمسلمين بيكرهوا بعض؟

انا شخصيا ما باكرهش غير اسلام نبيه وجورج بوش

شوف انت بتكره مين

:)

مُرَاقِبْ مِصْرِي said...

هاني جورج

طول ما فيه إدمغة زبالة كدة عمرنا ما هننضف أبدا!!

المسيحيين عندهم هسس في موضوع تغيير الدين ومؤامرات الأسلمة وخطف البنات والمسلمين عندهم هاجس خفي إسمه المؤامرة التنصيرية الصليبية... والطرفين شغالين فعص في بعض والضحية في الآخر الإنسان وحقوقه

والنتيجة النهائية قطعان من المتدينين ولا أثر للإيمان!!

وخلي الكل يشربوا
========================



نوارة

أولا أنا ما قبلتش بمبدأ المساعدات المشروطة على الإطلاق (سواء خد بيت وبقرة واتنصر أو هنشغلك بس لازم بناتك تتحجب)... وإن كنت أقر بحق التبشير والدعوة لكل الناس ولكل الطبقات الإجتماعية... مالك يا نوارة؟ أنا فعلا مستغرب أنك مش فاهمة كلامي!! أنا ضد استغلال البشر قطعا وضد المتاجرة بالدين... بس في نفس الوقت من حق الجميع أن يدعوا لما يعتقدونه دون قيد أو شرط... مش كل تبشير بيحصل بيبقى مغرض وبيستغل البشر ومش كل دعوة للإسلام بيبقى فيها مؤامرة وخطف بنات... بس دايما الكويسين قليلين... أنا بقى بدافع عن المبدأ وعن القلة اللي بتطبق المبدأ كويس وبانتقد معاكي الأنشطة الاجتماعية المشروطة تحت أي مسمى... فهمتي ولا نقول كمان؟

ويتبقى السؤال لحضرتك عشان بس ما انبحش قلبي معاكي كتير... إنتي مؤمنة بحرية تغيير العقيدة ولا لأ؟؟ ومؤمنة بحق الدعوة إلى أي معتقد ولا لأ؟؟

karakib said...

قطعان من المتدينين بدون ايمان
الكلمة دي فالجون

spellz said...

الله يرحم جدة صاحبتى كانت معلقة سورة العذراء على الحيطة فى الصالة عشان هدية من كنيسة عزيزة عليها
والله يمسيها بالخير صاحبة خالتى المسيحية الى كانوا بيصيفوا عندها
و أنكل رأفت جارنا الى بيخدمنا فى كل السفريات و هو الى شال بابا لما عييى
و رئيس الدير الى طلع بابا رحلة عشان خدماته
اصحابه المسيحيين باسو ايده عشان راحوا الدير بواسطته
و رجع بابا محمل بخيرات الدير و اكلنا فى الحجات شهر
حتى ادانا زيت البركة ندهن بيه بس طنط جارنتا اخدته و الأيقونات بابا هادا بيها اصحابه
مام و خلاتى كانوا بيباتوا فى بيوت اصحابهم المسيحيين و هما صغيريين لا دول كانوا بيخافوا من تنصير ولا دول بيخافوامن اسلمة
غير بس البلاوى العجيبة الى طلعت فى المقدر جديد
!!!

bluestone said...

مزيد من الخزعبلات
المشكلة ان اللي هيستجيب لدعاوي زي دي مش بيروح لانه مؤمن او صعبان عليه الفقرا اللي بيناموا من غير عشا ولا عايشين في عشش صفيح
لا هو هيروح عشان يمنع انصار المعسكر التاني مايجيبوش جون ..
وطبعا الحكومة بتشجع اللعبة الزفرة

Anonymous said...

انا فى رأيى ان سبب المشكله هو الكلام فى الدين بشكل فيه انتقاد لأى من الطرفين يعنى اذا كنت حابب تتكلم فى الدين مع صاحبك مسيحى او مسلم ممكن تتكلم فى حاجات عامه يعنى مش لازم تخوض فى الحاجات اللى مابتعجبكش وتتنقدها لأن مستحيل الطرف التانى هيسمح لك انك تنتقد دينه وهيبقى الحوار متعصب وممكن يبقى متطرف ....
على فكره انا مسلم ومش حاسس بأى مشكله بينى وبين رامى ( صاحبى الأنتيخ ) مسيحى ملتزم الى حد ما أقولكم بلأمانه احيانا بحس انه عيل خبيث وأقعد أهزر معاه وأوصفه بال ( قسيس ) والحمد لله هو عمره مافهم هزارى ده على انه انتقاد لشخص رجل دين المهم رامى دايما يثبت لى بتصرفاته انه مش خبيث ولا حاجه وان انا اللى شكاك ودماغى جزمه .... رامى يوم كتب كتابى عمل معايا واجب تمام لماأجر عربية على حسابه وعزمنى على العشا انا والمدام ودى حاجه من ضمن حاجات كتير عملها من غير ماأطلبها منه وغيره كتير من اصحابى مسيحيين وعمرى ماحسيت ان فى مشكله بينى وبينهم.... نفسى أعرف البلوه اللى اسمها الفتنه الطائفيه دى اتحدفت علينا من أى داهيه ؟
السؤال الأهم بئه .... هل وجود اليهود فى مصر قبل الثورة كان عامل توازن مابين الديانتين ولا الكلام ده تخريف ؟

yasmina said...

حسب رأيي لكل الحق في دينه وعقيدته
وكل واحد حر اذا كان يحبذ نشر ديانته ولكن يجب ان لا تكون على حسا اشخاص اخرين او اسءة الى طرف اخر

بالنسبة لي لا تفرق من الذي اكلمه اكان مسيحيا او مسلما المهم الانسانية
الشخص هو المهم وليس الدين

كل ما يحدث هو فتن لاثارة النفوس وتهييجها واهم اسبابه التعصب من الطرفين

elbostagy2 said...

السلام عليكم ورحمة الله وبركاته

طبتم وطاب ممشاكم وتبوأم من الجنة منزلا

ياريت نشارك في الحمله دي

غزة لن تجوع ولن تركع

وجزاكم الله خيرا

The Alien said...

طول ما بنحشر الدين ف كل حاجة
طول ما هنفضل ف اللي إحنا فيه
لا دا عنده حرية عقيدة
ولا دا عنده حرية تغيير
وكله بسبب المتخلفين اللي ماسكين الميكروفونات
وعمالين يملوا الناس بخرافات

علي فكرة
حلو موضوع اﻷندلس المغتصبة
دا علي أساس إن العرب موطنهم اﻷساسي أسبانيا

تحياتي

Unknown said...

الدين لله .,,,, احنا مالنا بالدين ..كل واحد حقوا يختار دينه ...لو طلع ناس بكرة بتعبد البقر فمصر محدش حيعترض .المشكلة ان السوس بينخور بين المسلمين و المسيحيين أنا مش عارفة ايه المشكلة طيب ما أنا مسلمة لله و الحمد لله فضل و نعهمة بس لما سناني بتوجعني بروح لدكتور فمستشفى الكنيسة ,.. لا هو بيسمني و لا بنعل دينه .... يا ناس من امتى أحنا فالبلد دي بنفرق المعاملة علي أساس الدين ..و هو انا عشا نبروح الكنيسة ابقي تنصرت و بعدين كلها ديانات ربنا

Unknown said...

عيب قوي لما يكون تفكيرنا بالشكل ده مش ممكن يا ناس تكون دي مصر أو هم دول المصريين
عمر ما وداني سمعت موضوع الفتن دا زمان كانت الناس ادفى من كدا ...ليه بنحكم عالناس بالدين ....... الدين دا بين الانسان وربنا ..... يعني محدش له دعوه بدين التاني ..لان الأدين مبتتعارضش أساسا اللي بيعمل الفتنه البشر و خير الخطائين التوابيين .... ارجعوا عن نار الفتنه لأن حريقها حيحرق كل حاجة و بدل ما ندافع عن مصر ونحميها من حراميها نساعدهم باننا ناكل فبعض وز هم يكلوا قوتنا و قوت عيالنا .... ارحمنا يا رب

moneer said...

ما اللى يبقى مسيحى مسيحى واللى يبقى مسلم مسلم
ايه المشكلة؟؟
هو انتوا ليه غاوين وجع دماغ؟
فككوا من الحوارات الفاشلة و ياريت نتعامل مع بعض على اساس اننا بشر وبس

ibn nasser - ابن ناصر said...

المؤامرات بقي

وكده انتا فاهم

,طنش لدول ناس

تحياتي

ibn_abdel_aziz said...

الغريب ان الفقير في الحالتين
باعتبار ان الايميل حقيقي او بافتراض صحته
الفقير يعتبر
‎‎Object
ننصره واللا نأسلمه؟
شوال بطاطس

يعني محدش سأل فيهم عشان هما فقرا اصلا

يتحرقوا الفقرا
فقرا ايه بس

وتعالوا نلغي بتاع 30 ايه من الانجيل علي 40 اية من القرآن عن الفقير وحقوقه

ونريح الزبون خاااااااالص

مصر دي دولة فريييييييييييييدة
:)
اوعي حد يسالني ..فريدة مين؟