Monday, July 30, 2007

دولة سب دين مصر

يعني انا ح اعيش عبيطة واموت بريالة
ايه بقى؟
بقى انا لما ابتديت مع مينا مدونة الحوار
كان هدفنا احنا الاتنين اننا ننقذ العرب من شر قد اقترب
وان مش معقولة يعني يبقى مواطنين عايشين مع بعض في نفس البلد
وبيعانوا نفس المعاناة
وبدل ما يمسكوا في المتسبب في معاناتهم
ماسكين في شواشي بعض
ومش معقولة كل ما امريكا تفرقع بمب
المسلمين يجروا على المسيحيين المصريين اللي زيهم بالظبط
وينزلوا فيهم هبد ورقع عشان ينصروا الاسلام
ومش معقول المسيحيين على طول مقموصين ومنزويين
و
"طب والله ما انا مكلمكوا هه بس"
وفتحنا الموضوع ودخل معانا ناس امرا
وكل واحد طلع اللي في قلبه ومية مية
ولقيت ناس كتير بتقول انها بتحب البلد وعايزة هي كمان
تتعاون معانا
ماشي قشطة
وبقيت انا ومينا نفتح مواضيع قصدنا نصفي النفوس
لدرجة ان الناس اتخضت مننا وافتكرتنا اعداء
واحنا اصحاب وعايزين نفتح الجرح عشان نطهره
جميل؟
لقيت من ضمن الناس اللي اتشاركت معانا في الحوار
بنت لطيفة على مجموعة
Fij
اسمها مريانة: اميرة وسكرة وكلامها يتحط ع الجرح يطيب
ولسبب ما مينا كان بيتخنق منها
وانا شايفة انها اميرة يعني البنت ما عملتش حاجة
المهم قالت لي تعالي معانا في منتدى
دولة ابناء مصر
دولة متخيلة: مصر زي ما بنتمناها
حب وتعايش بين مواطنيها
مساواة في الحقوق والواجبات بصرف النظر عن الدين
فل الفل..قوم رحت جري اشتركت في المنتدى
وقعدت شوية مشغولة بكام حاجة كده
وبعدين قلت ما ادخل على ابناء مصر واشوف اخبارهم
دخلت على دولة ابناء مصر المبنية على التعايش والمحبة
والديمقراطية والمساواة
ولقيت الديمقراطية عندهم لها انياب
وانياب مسنونة على المسلمين بالذات
وكأن الدولة المتخيلة
هي دولة قصاص وانتقام من المسلمين
لصالح المسيحيين
وكأن دستور الدولة: بس ربنا يقدرنا عليكوا يا ولاد الكلب
ح نطلعه على عنيكو
وعندها واد مجنون كده مسمي نفسه
قوة الصليب
والظاهر انه كان بيحضر في كنيسة ابنوب
آه ابنوب ده صاحب زينب اختي
مرة جالنا وهو عنده اربع سنين وقال لزينب
- كان عندها خمس سنين –
النهاردة كنت في الكنيثة ومحمد اخد مننا الثبثي
ام زينب قالت له محمد مين يا حبيبي
قال لها محمد النبي بتاعكوا وذعوا علينا ثبثي
وبعدين النور قطع ومحمد ابو فاطنة اخد مننا الثبثي
ام زينب قالت له مين يا حبيبي اللي قال لك كده
قال لها ابونا
طبعا الكنائس في مصر زي الجوامع
يعني زي ما فيه مسجد بيتكلم عن المحبة والتسامح
في مصر الجديدة
فيه مسجد في فيصل بيتكلم عن عباد الصليب
والمسيحيات الغنائم
والنبي ما عارفة عايزة المسيحيات غنائم في ايه
ما احمد زي الحاج احمد
والمسيحية المصرية اللي ح يغتنمها
شبه المسلمة المصرية اللي هو راميها في البيت
يعني ما عندوش حتى رغبة في التجديد
واهو اهبل ومخه تعبان زي القسيس اللي بيقول لعيال
عندهم اربع سنين ان محمد ابو فاطنة اخد منهم الشيبسي
ومسيرهم يكبروا ويعرفوا انه كداب
وزي ما ده موجود فيه كنيسة تانية بتحضرها واحدة صاحبتي
القسيس قال لهم في الدرس: بدل ما اول ما يجي الادان في التلفزيون
فتقفلي او تحولي القناة..احنا مواعيد صلاتنا زي مواعيد المسلمين
وزي ما بتشوفيهم بيسيبوا كل حاجة في ايديهم ويقوموا يصلوا
انتوا كمان لما تسمعوا الادان قوموا صلوا
وعلموا ولادكوا الحب واتعلموا تحبوا
بدل ما تفضلوا طول الوقت ترثوا لحالكوا
لو حبيتوا الناس لانهم خليقة الله
الله ح يحبكوا والناس ح تحبكوا
اهو ده قسيس وده قسيس ودي كنيسة ودي كنيسة
زي ما دكهه شيخ ودكهمة شيخ
ودهون جامع ودوت جامع
وكل واحد وبخته والمنطقة بقى اللي ساكن فيها
والظاهر ان الاخ
قوة الصليب اللي موجود في دولة ابناء مصر
بتاعة الانسة وللا السيدة مريانة
كان بيروح كنيسة شبه كنيسة ابنوب
والظاهر ان كيس الشيبسي حارقه لحد دلوقت
ما عندوش حاجة يتكلم فيها غير
ان سيدنا محمد راجل فاحش وسباب ولعان
ومدعي نبوة ولا ينفذ تعاليم الاسلام اللي هو جاء به
وسيد الخلق بتاع ايه ده
وكان ناقص يقول: هات كيس الشيبسي بتاعي يا حرامي
واحد تاني برضه اسمه
جرجوري
بس الحقيقة ماعندوش مشكلة مع سيدنا محمد بالذات
هو عنده مشكلة مع الاسلام كله والمسلمين كلهم
عنده مشكلة بالذات مع عزير اللي هو مصمم يسميه
عمو عزيز بتاع اليهود
والست مريانة بتاعة الدولة والتعايش
وصلت واحد من الرعايا
- اللي هو بالمناسبة ملحد –
انه يقول يا اخوانا انا ملحد بس ما ينفعش سب الدين
على طول على طول للمسلمين كده
والغريبة ان يا عيني المسلمين اول مرة يبقوا ياعيني بجد
يعني حاجة ياعيني يا عيني خالص
عمالين يردوا من هنا ومن هنا
وانا مش فاهمة بيردوا على ايه
يعني اللي انا افهمه في التعايش
ان الدين لله والوطن للجميع
وان كل انسان عليه ان يحترم عقيدة الاخر
وانه لا يجادل الا بالتي هي احسن
معلش رسولي السباب الفحاش اللعان
اللي بياخد اكياس الشيبسي من العيال
هو اللي علمني كده
طيب يا اخت مريانة فين التعايش ده
فين الديمقراطية دي
خصوصا ان لما واحد من مواطنين دولة
سب دين مصر بتاعتك
نزل قرآن في قسم الفنون بصوت مقرئ
معروف ان صوته حلو
حمرتي له عينك وبرقتي له
وقلتي له: ايه ده ايه ده
احنا بقى ح نقلب الدولة لدولة دينية
وح تروج لي للاسلام هنا؟
ولما قال لك فين الترويج ده قرآن
والحقيقة يا سيدة مريانة القرآن مش غريب عليكي
انت مصرية يعني اكيد سمعتيه على الاقل وانت ماشية
في الشارع
قلتي له مافيش مسيحي بينزل اجزاء من الانجيل على الدولة هنا
ياختي يا ريت
يا ريت
خليهم ينزلوا ايات من الانجيل
بالذات احبوا اعداءكم
باركوا لاعنيكم
خليهم ينزلوا صلوات محبة
يمكن تشيل السواد اللي جوا الاخ اللي مسمي نفسه
قوة الصليب ده والتاني جرجوري اللي شاغله قوي
عزير اللي قراها عزيز
الحقيقة انا اكتر حاجة اكرهها في حياتي اني اتاكل على قفايا
يعني انا دلوقت
ودلوقت بس
احترمت موقع الاقباط المتحدين
لانهم صرحا وواضحين
ما بيدعوش انهم عاملين دولة الكترونية
للتعايش والمحبة والديمقراطية
وهم عاملين موقع طائفي ينشروا فيه غلهم
وامراضهم بدل ما يعالجوها
انا قريت اربع مواضيع لقوة الصليب
وهي تقريبا كل المواضيع اللي هو كاتبها
ومش كاتب في اي موضوع غير عن سيدنا محمد
لدرجة اني حسيت انه وهو صغير واحد مسلم اسمه محمد
اغتصبه
وقرر ينتقم من كل اللي اسمهم محمد
وعلى رأسهم بقى كبير المحمدات
وكام موضوع للواد الشرشوح اللي اسمه جرجوري
اللي ما بيعملش حاجة غير يشتم وبس
والله ما فاكرة قال ايه من كتر ما كلامه تافه
المهم انا قريت المواضيع دي من هنا
وحسيت ان الخزوق اتقلوظ واتظبط
واخدته شنيور محترم
لقيت نفسي عضوة في منتدى
بيحض على الكراهية والطائفية
واهانة المقدسات في اتجاه واحد
منتدى معظم اللي فيه يا اما مرضى بالكراهية
والحقد الطائفي
يا اما عبط وجالهم التهاب رئوي من الريالة
اللي نازلة على صدرهم
وانا على رأس النوع التاني طبعا
ما شفتش قدامي بقى
بعت رسالة خاصة للاخت مريانة
مش فاكرة والنبي قلت ايه
بس فاكرة اني شتمت كتير قوي
انا كده
اللي يستكردني احس اني عايزة اشرب من دمه
اكتر حاجة اكرهها في حياتي الادعاء والغش
والتدليس
انا عمري ما دخلت على الاقباط المتحدين
ولا على اي موقع سلفي بيشتم
"عباد الصليب"
وشتمتهم
لانهم مش غشاشين ولا مدلسين
لكن انا ما احبش احس اني
.....اتقرّصت....مشيها اتقرّصت
والاخت مريانة قرّصتني
وقرطصتني
وانا عادة بعد ما باشتم اللي بيعمل فيا كده
بارجع
مش من الغيظ
من القرف والاحتقار
لينكات دولة بعابيص مصر
اهيه
معلش اصلي قليلة الادب
ما انا مسلمة بقى
اتفضلوا
اقروا بنفسكوا
ويا ريت ما تقروش نص الموضوع بس
ارجو قراءة الحوارات التي دارت بين اعضاء المنتدى

22 comments:

ahmed abo eldahab said...

صدقيني اشد حاجه في اسلوبك
انك محااااااايده جدا
وبتزكري عيوبنا كمسلمين متعصبين
زي ما بتذكري عيوبهم

بجد تحياااااااااااااتي

وبتعلم من اسلوبك كتيييييييير

GIGO said...

برافو عليكى بجد انا نفسى اننا نحب بعض زى زمان ..انا مسيحى ومعجب باسلوبك وياريت تستمرى على كدة وماتخليش حد يقلب الموضوع او يسخنك دينيا فتنحازى للمسلمين وليكون ميثاقك الشرف والامانة والحق لجميع المصرين

dr.Roufy said...

للأسف صارت الديموقراطية لوحة براقة تجذب الثيرين من مرضى النفوس..والموتورين
ولا يهم..هنا نوع انتمائهم دينيا ..كان أم غير ذلك
وصارت الحرية..المفتاح السحري..للسب..والكذب..ومهاجمة كل ما يمكن او لا يمكن حتى الهجوم عليه
هل هذه هي دولةمصر؟
والله شئ مؤلم ..ومؤسف
أنا طول عمري كانت دراستي في مدارس للراهبات..وأصدقائي من المسيحيين كثير
لم نفكر هكذا
ولا يوجد ما يستدعينا للتفكير المريض المنغلق هذا
هل من الحكمة لأبناء مصر هؤلاء..أن يعادوا دين الأغلبية المصرية..ويلعنوا..مقدساتهم
هل بعد هذا..يبقى لهؤلاء الأبناء المدعون..أما..تسمى....مصر؟
وعجبي

Gypo said...

I'm really happy to find that there are still reasonable people in Egypt

محمود الششتاوي said...
This comment has been removed by the author.
محمود الششتاوي said...

بصراحة مفيش كلام يتقال بعد كدة رغم اني معترض على الكلمة الأخيرة اللي ذكرتيها بع*** يعني مكنش لها لزوم

من العجايب بقى ان حسام اللي دخل اعترض ده هو فعلاً ملحد وانا على خلاف دائم معاه في منتدى كفاية وقابلته كمان في مرة لكن الحقيقة طلع محترم.

قال ابناء مصر قال

bluestone said...

الله يخرب عقلك .. ده انا ضحكت لما جنابي وجعتني .. :)
انا مبطلة المواقع دي تماما .. كان لي تجربة مهببة مع منتديين واحد اهلاوي والتاني زملكاوي ..
قصدي واحج زي الاقباط متحدين كده
والتاني كان اسمه شبكة مش عارف ايه كده الاسلامية
المهم كنت ادخل على الموقع الأولاني واغلبه مصريين عايشين في امريكا اتملي غل وآخد شحنة حرق دم ..
صحيح فيه ناس قلبها ابيض وغلبانة لكن مش فاهمة حاجة خالص

وبعدين حاولت افهم الناس بس مفيش أمل
بس كانت القشة اللي قصمت ضهر البعير بجد لما واحد كان باعت رسالة انه حابس نفسه وبناته في البيت خوفا من المسلمين احسن يخطفوهم وانه بقى مش قادر يمشي في الشارع
وانه لما بيشوف واحد ملتحي ماشي بيترعب ويخاف على حياته .. كانت رسالة استنجاد

بصراحة بقى انا دمي اتحرق وبعت رد شحتفت فيه أمل الراجل وقلت له انت تقريبا عايش في الصومال ولا في دارفور عشان انا عايشة في القاهرة ولما بنزل الشارع محدش بيخطفني ولا بيضطهدني ولا الدم نازل أنهار انهار في الشوارع الحقيقة .. محدش قاللي يعني

وكانت دي آخر عهدة ليا بالموقع لان حسيت اني بأدن في مالطة ..

اما الموقع التاني ده فكنت من السذاجة باني كنت بحاول ارد على المقالات الساذجة اللي بيدعي اصحابها انهم اكتشفوا مفاجآت تكشف زيف المسيحية وكذب المسيحيين .. إلخ
وطبعا كانت مقالات محتاجة عيل معاه ابتدائية عشان يفندها ..

لكن بصراحة كانوا بيحذفوا كل الردود ..

الخلاصة ان الناس دي اصلا متبرمجة عشان ماتسمعش .. بيبقوا عايشين على الغل والحقد

وبعدين يا نوارة أصل اللي قاعد في واشنطن وعمال يخدم ربنا على الانترنت ضد الارهابيين اصحاب دين العنف

ولا اللي قاعد في الرياض وشغال فتاوى ضد النصارى عباد الصليب الكفرة

لا ده خسران ولا ده خسران
الاتنين قاعدين في التكييف
والدولارات متستفة

واحنا اللي بناخد في دماغنا
اللي هتطربق عليها الدنيا لو مافوقناش

Bou-ME said...

ماتزعاليش مني يا نوارة و محدش يضايق من اللي هاقولوا
عمر ما الصليب هيبقى في حضن الهلال

لا دوول عايزين دوول و لا دوول مستحملين دووول

و على فكرة ما زكريا بطرس عامل فناة طووول الليل و النهار سب و شتيمة في
الدين الاسلامي

و ناس تيلة قوووي في مصر بتدعمه
زكريا بطرس ده اللي كان قسيس و الكنيسة شالت منه اللقب

ده غير الشاتينج رومز اللي في البال تاك و غيره و غيره

بتنفوخي في اربة مخرومة يا نوارة

اسلام رفاعى said...

عذرا عن التحليق خارج السرب
من اجل رفع الظلم عن المظلومين
ادعوكم للمشاركة فى حملة رفع الظلم عن طلاب الاسكندرية المختطفين
التفاصيل بمدونتى

الدرويش المرووش said...

الناس دى سبب التخلف اللى إحنا فيه
أنا مش فاهم و هافضل طول عمرى مش فاهم

هو الواحد علشان يدعو الناس لدين أو فكره أو حتى ساندوتش

يقعد يشتم فى دين أو فكرة أو ساندوتش الناس التانيين
ولا
يمدح فى جمال و حلاوة دينه و فكرته و ساندوتشه؟؟؟؟؟

صحيح على رأى الشاعر القديم
اللى هو أنا

أكاد لفرط عقلى أن أجن

mraghy said...

السلام عليكم و رحمة الله و بركاته
حقيقي بعد الموضوع اللي حضرتك كتبتيه
و بعد الردود اللي انا قريتها هنا مش لاقي اي كلام اقوله
مع الاسف ان اخواننا المسيحين ( معظمهم مش كلهم ) رضعوا كره الاسلام و المسلمين في كنايسهم
و المحبه و التسامح اللي دينهم بيقول عليه ده بيستخدموه وقت اللزوم بس
انا كتير قوي قدرت احصل علي بعض المحاضرات التي يتم القاءها في الكنائس و سمعت كلام غريب جدا جدا علينا طبعا ده مش وقته اقوله هنا
انا شخصيا و رغم اني احد احفاد الشيخ المراغي شيخ الازهر السابق لكن عمري ما شفت في بيتنا اي كلام يخص المسيحين
عمر ما والدي مثلا قالي ابعد عنهم او مالكش دعوه بيهم
لا
بالعكس
ده مدير اعمال والدي كان مسيحي و كان بيجي عندنا البيت و يقعد و ياكل

ياريت الاخوه المسيحين يعرفوا كويس اننا شعب واحد و ان عدونا واحد
و ياريت المحبه بتاعة زمان ترجع
اعتقد انه في حرب اكتوبر كان المسيحي بيحارب جنب المسلم
لكن الاعداء مالاقوش حل مع الشعب المصري غير انه يوقعوه في بعضه
يقسموه مسلمين و مسيحين
من مبدأ فرق تسد ، طبعا كلكم عارفين المبدأ ده
اسف للاطاله
تقبلي مروري

mraghy said...

اه
نسيت اقول كمان ياريت بعض المتشددين من المسلمين يعرفوا الموضوع ده كمان
ماهو زي مافيه هناك ناس موتوره فيه برضه عندنا ناس موتوره

Demiolla said...

انا مسيحى ومعجب باسلوبك وياريت تستمرى على كدة

ابو صهيب ( الجمعاوي الاصيل)سابقاً said...

معلش انا هتكلم خارج الموضوع
لكن استحملوني
هناك حملة للمدونين باسم انشرواالاسلام
قام بها المدونين بحارة زعتر لمعرفة التفاصيل والمشاركة زورونا على هذه الروابطhttp://bentmoslema.blogspot.com/
http://miikha.blogspot.com/
وشاركونا ومعلش مرة اخرى خرجت عن الموضوع

نسرين - أمة الله said...

السلام عليكم
كل سنه وانت طيب
وربنا يجعله خير على المسلمين اجمع

ا بـن عــمــر said...

أول مرة أعلق
وياريت لا تكن اخر مرة
بس البوست
جميل ونريد بعض التفاصيل
لو فيه رد ياريت
على مدونتى

mthlykaweyy said...

هاى
ازيك عامل ايه
انا مثلى قوى قرات مقالك وعجبنى بجد
انت ذو عقليه وتفكير جميل

اسمحلى اعرفك بنفسى انا من المثليين العربولدت فى مجتمع ينبذ المثليين ويعاديهم ويكرهم على شىء ليس باديهم

فى جين ان كل العالم المتحضر اعترف بالمثليه

اكبر صريحين علميين فى العالم كله اعترفوا بعد الدرسات العلميه ان المثليه امر طبيعى والذى بهم معظم اطباء وعلماء العالم وذلك بعد الدرسات

بجانب الدرسات العلميه الحديثه التى اجريت على الحيونات والحشرات ايضا
ووجدت ان المثليه امر طبيعى وعادى

ولكن كما تعلم فى بلادنا الشيوخ هم علماء ويفسروا القرءان حسب ما هم مقتنعون به فاخلطوا بين اللواط والمثليه

والعلم اثبت اختلاف الهيوبلاتومس وهى المنطقه الموجوده للدماغ للمثليين عن المغايرين

العيب فى الشيوخ وليس فى الدين
كما سبق وان فسروا سابقا ايه فى القرءان على ان الارض بيضاويه وظلوا نصف قرن يعتقدون هذا وكل الناس تناضل من اجل رايهم الى ان اتى العلم واثبت انها كرويه

وبعدها ادركوا انهم اخطاوا

علاوه عن المجتمع الذى يمارس الكراهيه والنبذ ومعاده المثليين

انا فاكر كويس كل يوم
كنت بقعد بليل وافتكر اى حد قلى كلمه جرحتنى فى المدونه
وابكى طول الليل وكنت اشعر بالحزن جدا
بجد نفسنا كلنا نحب بعض بدون كراهبه او ضغينه

ما اردت ان اقوله لك اننا نمد ايدينا اليك بكل الحب والصداقه
واريد ان نكون اصدقائكم

انا هعطيك اميلى
h_h6497@yahoo.com

ممكن تضفنى وتكلمنى
هنتظرك

وعلى فكره بجد انت مدونتك حلوه وعجبانى
مووووووت جدا بجد انت تفكيرك جميل اوى جدا
سانتظرك تاتى مدونتى
وتضيف اميلى

هتوحشنى جدا
باى باى

28 سبتمبر, 2007 12:47 م

ملحوظه انتم كلكم مدعوون الى مدونتى لمن يريد ان يعرف ما هى المثليه

ومن يريد صداقتى فالاميل تركته فى الاعلى فليضيفه وبكلمنى على المسنجر
بس هستناك انت بالخصوص
باىباى

Unknown said...

اكثر ما يحز فى نفسى , النفاق, و الحقيقة ان اخونا المسيحيين على الرغم من انهم عيشين معانا من ايام كحت البحر, كأخوة متحابين, بيعملوا مواقع غريبة جدا كلها غش و تدليس, قال ايه احنا بنتهضهم و بنجبرهم على الاسلام, طيب ولما هو كدة اذاى بقى انت فضلت مسيحي يا خفيف. كمان انا منكرش ان فى مسلميين كتير بيشوهو صورة الاسلام عندهم, خصوصا لما يجي واحد فتك عامل نفسه حامى حمى الاسلام و يقول لواحد مسيحى يا كافر, حقيقى فى مهازل بتحصل

بنت القمر said...

بصي يا جبهتي
حملات الكراهيه كتير ومنتشره المصيبه بتبقا مع الاطفال زي ما تفضلتي وقلتي
لما مديره مدرسه محترمه وراهبه بتاعه مدرسه بنتي تقول للاطفال بمناسبه احدلث الفتنه اللي في اسكندريه السنه اللي فاتت ان المسيحيين اصل البلد وصحابها قبل العرب ما يحتلوها ولازم كل بنت مسلمه تعتذر للبنات المسيحيات عن افعال الارهابيين المسلمين
ولاحظي الكلام دا بيتقال لعيال في مرحله ابتدائي
من 6 الي 13 سنه وعيهم يتشكل ازاي
المسيحيه حاسه انها مظلومه مضطهده غير امنه مسرقه بلدها والمسلمه حاسه انها مجرمه سارقه وطن ارهابيه
ولازم تعتذر طب هي عملت ايه عشان تعتذر مش عارفه بس ما سور قالت لنا كدا
لما بنت صاحبتي مسيحيه تلعب جيمز علي النت تجيلها دعوة من خلال اسمها المسيحي تقوم تشترك في منتدي من اياهم بتاع الصور بتاعه حرق وقتل الاقباط رغم ان البنت عندها عشرسنين
طب البنت وعيها يتشكل ازاي
تروح مدرستها ازاي تكلم البنات المسلمات وتلعب معاهم ازاي
الكبار يولعوا
بس الاطفال حررررام
حررررام تحياتي
بجد البوست دا جالي شخصيا علي الجرح
حرام ارحموا الاطفال كله الا الاطفال

ahmed mefrh said...

مش عارف اقول ايه
و لكن تحياتى اليك و الى فكره مدونتك الجميله ذات الغرض النبيل

ابو مفراح

Anonymous said...

Hello. This post is likeable, and your blog is very interesting, congratulations :-). I will add in my blogroll =). If possible gives a last there on my blog, it is about the TV de Plasma, I hope you enjoy. The address is http://tv-de-plasma.blogspot.com. A hug.

Anonymous said...

ياريت ترجعوا تدونوا تانى ليه وقفتوا المدونه