Friday, June 15, 2007

البيضة ولا الفرخة....المسيحي ولا المسلم

سؤال غبي
مين الاول المسلم ولا المسيحي
اللي جه مصر الاول
اجابة بديهية
لا ده ولا ده
__
لسه فاكر وانا صغير عم الشيخ يقف ع المنبر
يجلجل بصوته
نحن لسنا ابناء الفراعنة
عليهم لعنة الله
بل نحن احفاد عمرو بن العاص
رضي الله عنه
_____
كنت في الكاتدرئية في العباسية بغطي مظاهرة للاقباط
ناس قالوا ان بنتهم  خطفها واحد مسلم
و اتفرج ع الهتافات
عايزين و لادنا عايزين بلادنا
_______
المشهدين دول وان دلوا فانما يدلوا علي حالة
التغفيييييييييييييييل
الشديدة التي تعيشها مصر ما بين فكر ظلامي قادم من الشرق
و فكر تفرقي قادم من الغرب
يا سيدي احنا احفاد الفراعنة اللي قبل المسلمين والمسيحين
مصريون
منا من امن بالمسيحية
و منا من امن بالاسلام
لكننا في النهاية مصريون
حتي  المزاوجة التي حدثت بين  جيش عمرو بن العاص رضي الله عنه
و  اهل مصر من القبط
انتجت مصريين
مش انا اللي بقول
علم الوراثة هو اللي بقول

لا المسحيين اخدوا الارض بوضع اليد
و لا المسلمين احتلوها

انا افخر اني مسلم و مصري و قبطي
و  لعلم اخوانا الجهلة
كلمة قبطي معناها مصري
لما جاء اليونانين لمصر
سموا اهل مصر قبطا
للقماش الذي ينتجون ويلبسون
كل واحد حر في دينه
لا ده الاول ولا ده الاول
قبل دول مصر كانت موجودة
ولا اجد خيرا من كلام السميع العليم اذ يقول في كتابه العزيز
"... لتجدن اقربهم مودة للذين آمنوا الذين قالوا انا نصارى ذلك بأن منهم قسيسين ورهباناً وانهم لا يستكبرون "سورة المائدة .

و هذه الترنيمة
مبارك شعبي مصر ده وعدك من سنين

خيرك أكيد لأنك إله صادق أمين
(تيجي بغناك وتملا بيوت المحرومين

ويفيض النيل ويروي جموع العطشانين
صوت الحزن يسكت نرنم فرحانين

مبارك مبارك مبارك (مبارك)شعبي مصر

و  قبل م امشي
الشعب هو للي مبارك مش حد تاني


1 HOME 1 PAIN



7 comments:

Bella said...

انا لااعرف إلي متى سنظل ندور في هذه الدائرة المفرغة؟؟

تفرق ايه مين جه الاول

ولا احنا احفاد مين

مش عارفة ليه دايما بافتكر المثل الشعبي اللى بييجي في الهايفة ويتصدر كلما دارت هكذا مناقشات

النتيجة اننا نعيش جميعا على هذه الارض ويجب ان نعيش بسلام حتى نتفرغ لما هو أهم

من مصلحة النظام الا يجد الناس وقت يفكروا فيه في اي شيئ

فكلما جد جديد تتحرك قبله فتنة طائفية

اتذكر العام الماضي في اسكندرية حدثت الاحداث المؤسفة قبل غنتخابات مجلس الشعب

والآن لشغل الناس بالتزوير الذي حدث

البلد مليان بلاوي متلتلة ونحن مازلنا نفكر نحن احفاد عمرو بن العاص ام رمسيس التاني أم ماذا

افيقوا ياسادة وانظروا حولكم لتروا الفتنة الطائفية تفطع اوصال الامة العربية من اقصاها لأقصاها ونحن مازلنا نفكر

ياأمة ضحكت من جهلها الأمم

جبهة التهييس الشعبية said...

هي بقت كده يا عم محمد

اول تدوينة تكتبها

تملاها مبارك؟

يبقى احنا عرفنا الفتنة جات منين

المسيحيين عمالين يقولوا مبارك مبارك

فالمسلمين افتكروهم بيغيظوهم

راحوا طلعوا تلاتينهم

عشان يبقى ينفعهم مبارك

:)

MOHAMAD HANY said...

الغالية bella
قوليهم اللي فاضحنا
جهل وتخلف و مجتمع ظلامي
و أمة تجر اذيال الخيبة
بس هي المشكلة يا بيللا
ان اللي بيدوروا في الدايرة المفرغة ده كتير
و اللي انت بتقوليه عن النظام صح
لعبة قديمة كانت تتبعها الدولة العباسية لشغل الناس عن فساد الحكم
بافتعا الصراعات الادبية بين جرير والفرزدق
لكن حنقول ايه

هم شعب كالببغاء عقله في اذنيه

MOHAMAD HANY said...

شفتي بقي يا زعيمة الجبهة

طلعم هم السبب
بس ده قبل م البابا يرفض تاييد مرشحي الوطني في الشوري ويبقي معارضة زي مينا مبيقول

:)

zenzana said...

طب مالهم بس الفراعنة؟
ما كانوا مريحين
انا يعم هدور علي اصلي الفرعوني واريح

zenzana said...

هو ليه دايما لازم نبص لورا في المواقف المهببة
يعني مبصيناش ورانا وشوفنا ازاي كان المجتمع بيعيش كل مواطنيه قبل ما يصل العسكر للكرسي؟
لكن بيصينا لورا عشان نشوف مين جاي الاول مع ان مين جاء الاول مش مهم
المهم انك عايش دلوقتي
ودا الواقع لازم تتفاعل مع مشاكله وتحلها او تفهم طبيعتهاعلي الاقل ودا اضعف الايمان

MOHAMAD HANY said...

الغالية علي اوي اوي راندا-تيتي حفيدة الفراعنة
احنا اتعودنا ناخد من التاريخ ما يفيد مصالحنا وبس
فضيلة الشيخ اللي حكيت عنه اخد من التاريخ ما يخدم مشروعه اللي جي من بره الهادف لمحو مصرية مصر
ففي رايي لا مصر دون الفراعنة
اما المسيحين المتظاهرين في الكتدرائية
فاخذوا من التاريخ انهم كدين اسبق تاريخيا من المسلمين
من باب
احنا جينا هنا الاول ولقيناها فاضية
كل واحد بياخد من التاريخ اللي عايزة من غير حياديه واعتراف بفضل الاخر
المستقبل يبدأ بقراة التاريخ

شكرا ع الزيارة يا زنزانة