Friday, June 15, 2007

للاجابة عن سؤال زنزانة

ليه المقارنة بين وضع الاقباط ووضع المسلمين في اوروبا وامريكا؟
لان ده كلام بيتقال
ولان المسلمين حاسين بعدم الامان وحاسين ان فيه حرب عالمية ضدهم
ومافيش تحت ايديهم غير المسيحيين المصريين
ودي الحقيقة هدية ع الطبطاب لامريكا
طبعا الكبت والقهر العالمي اللي بيتعرض له اتباع الديانة الاسلامية
سبب امراض اجتماعية
ونفسيات
يعني مثلا
الاستاذ اللي سايب ميله:)
عايش في امريكا
وواضح انه بيعاني من قهر زي اي مسلم عايش في اوروبا والدول المتقدمة
حكاية مش صحيح ان المسلمين بيتعاملوا وحش هناك
لا بيتعاملوا وحش
وفيه فترة اتف عليهم في الشوارع
واضربوا بالرصاص
وبيتفتشوا كأنهم مهربين مخدرات
الى جانب انهم بيتعرضوا للقهر من حكوماتهم بتهمة انهم ارهابيين
لمجرد ان واحد فيهم بيصلي في الجامع
طيب فين السؤال؟
يعني ايه دخل المسيحيين المصريين في المصايب اللي بترف على دماغ المسلمين من كل ناحية
هم مالهم؟
مافيش
مالهمش
غير انهم عدد قليل في مجتمع غالبيته مسلمين
وجات الفرصة انهم يعملوا فيهم اللي بيتعمل فيهم
زي العيل اللي امه تضربه فينزل الشارع ويمسك قطة ويقعد يعذب فيها
تنفيس يعني
ده غير ان فيه حالة عالمية من الطائفية والصراعات الداخلية
سببها امريكا طبعا
والحرب على ما يسمى بالارهاب
لان اساسا طبيعة المجتمع الامريكي انه عرقي وطائفي وعنصري وابن وسخة
وكل مفاهيمه دي صدرها للعالم بما انه هو القوة الوحيدة والاولى في العالم
الحقيقة الاولى والتانية والتالتة والاخيرة
الاقباط بيستقووا بامريكا؟
ده كلام بعض المسلمين
وما تقدرش تقول انه كله غلط
ولا تقدر برضه تقول ان كله صح
فيه واحد اسمه الانبا ماكسيموس
عمل بنصيحة عادل امام: انا لو منك افصل لي واحدة زي البتاعة
واجي الصبح بدري واقعد اول واحد
او اجيب صعايدة وبالشوم في الازاز
فعلا
الانبا مكسيموس راح فصل لبس زي لبس البطريرك
وقال عملنا كنيسة تانية
نعمل فيها اللي على كيفنا
والانبا مكسيموس جاي بالبراشوت من امريكا
والمسلمين تعاملوا مع القضية على انها شأن مسيحي مسيحي
ولا على بالهم
يا جمالي
طيب تعالوا بالذات نتكلم في موضوع الاستقواء بامريكا
اللي فيه ناس عملاه المشاية اللي بتمسح فيها وساخة الاعتداءات
على مواطنين ابرياء
المسيحيين على تلاتة
جزء ما يعرفش امريكا ولا شافها او زارها زيارةعابرة أو عايش فيها ومالوش دعوة بخطتها فعلا
بس طفش من البلد زي اي مصري بتجيله فرصة يطفش من القرف
ويشوف مستقبله وفي التلات حالات مطالباته بحقوقه مشروعة
وفعلا بعيدة عن الاجندة الامريكية تمام البعد
وجزء فعلا عميل زي اي عميل بفلوس والعمالة لا لها دين ولا ملة
وجزء مش لاقي حل للقهر غير انه يستنجد ان شالله بابليس عشان يتعامل معاملة البني ادمين
اسمع واحد بقى يقول لي كلام حنجوري من بتاع ولو وطنه بيقطعه مش لازم يعمل كده
الكلام ده مش عملي
ومش واقعي
ومش انساني كمان
بدليل ان احنا نفسنا
اي المدونين مثلا
لما تبنى جزء مننا قضية التعذيب
مالقاش حل غير انه ينزل الفيديوهات ع النت
عشان امريكا تشوفها
ويحرجوا الحكومة فتضطر تاخد موقف
وفي اي حاجة احنا بنزلها ع النت
بيبقى هدفنا اننا نعمل فضيحة عالمية
توصل للعالم بشكل عام
وامريكا بشكل خاص
اللي بدورها بتهدد مصر بخفض المعونة لو ما حلتش المشكلة دي
طيب اشمعنى المدونين والمجتمع المدني
مسموح لهم يعملوا حملات عالمية للافراج عن المعتقلين مثلا
او لفضح التعذيب
وساعتها ما يبقوش خونة
واللي يقول علينا خونة يتفضل يقول لنا حل تاني
انا عمري ما رحت امريكا
ومش ناوية اروحها
وبصراحة وبشكل غير موضوعي بالمرة
باكرهها وباكره كل حاجة فيها
لكن مضطرة الجأ للنت وللحملات العالمية
ولو لزم الامر للصحفيين الاجانب
عشان انقذ ناس من السجن او التعذيب او الفقر او او
حلال ليا عشان انا مسلمة
وحرام على المسيحيين عشان كفاتسة وعضمة زرقا؟
اي منطق ده؟
طيب يعملوا ايه؟
ايه الحل؟
الناس لما تحب تبني كنائس تعمل ايه؟
الناس لما يعتدى عليها
سواء بقى من جهلاء
او من ناس فعلا الامن مسلطهم عشان الحكومة تفرق وتسود
تعمل ايه؟
لو مافيش قانون يحميهم
ومافيش لهم حل
ومافيش غير انهم يرقعوا بالصوت ويقولوا يا عالم الحقونا
يعملوا ايه؟
على الجانب الاخر
المسلمين حاسين ان ده معناه ان المسيحيين بيقولوا لامريكا
روحوا احتلوا مصر عشان تنقذونا
زي ما احتليتوا العراق عشان تنقذوا الشيعة
والحقيقة دي مخاوف انسانية ومشروعة
طيب
دول طلعان ميتين اللي جابوهم بالعربي والانجليزي ومافيش حد من ابناء وطنهم
معبر قرعتهم لمجرد انهم من دين مختلف ومشاكلهم مش مهمة بقى
اصلهم عشرة في المية
ودول برضه طلعان ميتين اللي جابوهم وخايفين من ان يشكل الاقباط
طابور خامس
والحقيقة الغالبية العظمي لا هي طابور خامس ولا نيلة
دول اغلب من الغلب
وكل اللي عايزينه معاملة انسانية
يجي واحد يقول لي: ومين فينا بيتعامل معاملة انسانية
مافيش
بس مشاكل الاقباط لها خصوصية
وعلى صعيدين
صعيد الدولة
وصعيد الشعب
ما نقدرش نحل صعيد الدولة ده غير بطريقة الرقع بالصوت
لكن نقدر نحل الغربة اللي ما بين المواطنين وبعض
لازم يكون واضح
ان الاقباط مالهمش دعوة باحتلال العراق
ولا عايزين مصر تحتل
والكلام ده لازم يبقى واضح
ولازم يكون واضح برضه
ان المسلمين لا يرفلون في النعيم والحريم والرز بلبن
وانهم طالعان تلاتينهم بشكل تاني
وان لا من مصلحة دول ولا دول
ان كل واحد يطالب بحقوقه بشكل منفصل
ولا من مصلحة دول ولا دول
ان حد فيهم يستقوى بقوة خارجية
وطرف اخر يستقوى بالعدد وفكرة الاغلبية
ها
واضح؟
وللا نقول كمان؟

66 comments:

amr220 said...

يا سلام سلم يا سلام
و طلعتيني عندي امراض نفسيه و واضح اني بعاني من فهر
برضه منك انتي زي العثل
يلا ... ادينا بنتسلي
لانتي حتبنيلهم كنايس
و لا هما حيبطلوا يسبوا دينك و اليوم اللي شافوا المسلمين فيه

الاستاذ اللي سايب ميله

جبهة التهييس الشعبية said...

والنبي انت اللي عثل

انا ما قلتش عندك امراض نفسية

انا قلت القهر بيخلق امراض اجتماعية

عندنا كلنا

nachoua said...

عندك حق فى قولة نحل الغربة اللى بين المواطنين. كلام واعى جدا وبيخللى كل واحد مننا عليه دور لازم يقوم بيه ونشيل الست الدولة من حساباتنا ونسيبها فى حساباتها هى اللى هى مش حساباتنا بتاتا.
و من نفس المنطلق انا بارفض دفاعك عن اللجوء لامريكا ولغيرها من بره عشان يضغطوا على مصر. لان امريكا عدو اولا واخيرا والاسباب معروفة. ثانيا هى برضه ليها حساباتها ومش حتضغط على مصر حبا فى المظاليم والا غيرة على حقوق الانسان. والا ما كانوش سابوا علينا اسرائيل وكل الدكتاتورات اللى بيحكمونا فى البلاد العربية واللى بيحكموا فى كل الدول الحليفة لها. قوليلى على نظام وطنى صالح واحد امريكا بتسانده.
عشان كده المطلوب مننا اننا نتكاتف احنا ولاد الشعب الواحد ونقوى ونسند بعضنا ونقف يد واحدة ضد اللى واكل حقوقنا.
البداية اذن فى ازالة الغربة اللى بيننا والالتحام بغض النظر عن مين مسلم ومين مسيحى. واننا نبقى حاسين ان اللى حيحس بى وينصفنى مش المسيحى الامريكانى او المسلم الايرانى وانما المصرى اللى من بلدى.

amr220 said...

طايب ما تسيبك من كل الهجس ده و تجيني العياده اكشف عليكي و اعالجك

ههههههههههه

الاستاذ اللي سايب ميله

ibn nasser - ابن ناصر said...

ههههههههه باين كده في الاخر هيطلع عدنا سبعين مليون واحد بيعانوا من القهر ! نعالجهم ازاي طيب

تحياتي

BeLiEvEr said...

من الكلام ده كله يبقى عندنا كام نقطة لازم نحددهم و نفكر حوليهم الأول

النقطة الاولى، مشكلة الأقباط فى مصر مشكلة مصرية تماما، مشكلة مجموعة كبيرة من المواطنين، هما و كتير غيرهم شايفين إن حقوقهم فى الوطن مش كاملة، أكيد مش كلها متاكلة، بس أكيد مش كاملة
و إن ملناش دعوة باللى بيحصل برة مصر بين الديانتين، إحنا بنتكلم عن المصريين هنا

النقطة التانية، إن لازم نعترف إن فيه مشكلة بين الطرفين شعبيا، يعنى فيه حيطة إبتدت تتبنى بينهم، و كل يوم يتعلى، لازم نهدها و نشوف حل لمشكلة الإغتراب اللى بين الطرفين، و ملناش دعوة بالدولة

النقطة التالتة، إن لازم الأغلبية تعرف إن أغلبيتها مش معناه التفرد فى الرأى، فيه مشاكل كتير و حاجات كتير لازم نفكر فيها كلنا بدون اى تقسيمات، لأنها هموم مشتركة

متهيألى إن إحنا لو وصلنا لإتفاق حولين النقط دى، يبقى حطينا رجلينا على اول الطريق

عاشق مصر said...

استاذه نورا اول مره اتفق معاكي 100%
بجد مقالة رائعة
ربنا معاكي
عاشق مصر
ماجد ميشيل

دنـــيـــا said...

انا موافقي جدا جدا علي كلامك ده بس انا عايزه اضيف ان الموضوع ده السبب الحقيقي فيه هو احنا المسلمين ببركه الفكر الوهابي الاي انتشر في الخليج العربي كله و انتشر كمان عندنا في مصر و هو ان الاقباط كفره و من خلال كده بدات المعاملات تختلف بين المسلمين و المسيحين و طبيعي جدا جدا ان المسيحين يشعروا بالغربه و المصيبه الاكبر ان الفكر ده فعلا هاوديني في حرب اهليه فعلا لازم نراجع افكارنا و سلوكنا و خير مثال علي كده ان الرسول صلي الله و عليه وسلم عندما دخل مكه امن الكفار و قال لهم القول الشهير لكم دينكم و لي ديني نحن في حاجه ماسه لانتفاضه فكريه اسلاميه صحيحه و ربنا يبعد عنا امثال بعض الشيوخ الاي بيظهروا في الفضائيات و ياكدوه علي هذا الفكر و الناس العاديه يصدقهم بدون تفكير البلاد مش ناقصه و الله العظيم

صاحب البوابــة said...

لي عودة متأنية للنقاش الجاد

بالاجمال فكرة الحوار رائعة

لكن يبقى وقودها اسلوبنا الحضاري في ادارتها

تحياتي للجميع

Dr. Kahil said...

ياجماعة أرجوكم بلاش نغمة مسلم ومسيحي إللى شغالة اليومين دول، أنتو عارفين مين اللى ورا الموضوع ده، وهدفهم ناكل فبعض وهمة نازلين سرقة ونهب فالبلد ومحدش واخد باله وحتى لو واخدين بالنا كلمتنا مش واحدة ومتفرقين وكل واحد فينا نازل شتيمة فالتاني، أرجوكم اصحوا شوية ووحدوا كلمتكم وصفكم ونحاول نعمل حاجة قبل المركب متغرق ونغرق فيها،،مش كده ولا إيه؟؟؟

Incomplete said...

عزيزيتي نوارة ..كده تمام جداًوشكراً جزيلاً
أنا هحط البانر عندي في المدونة بعد اذنك طبعاً
ومبروك علينا كلنا المدونة الجديدة
====
انا بقالي اليوم كله بطوله تقريباً بقرا في المواضيع والردود هنا وهناك..ورأيي اللي كنت هقوله سبقوني وقالوه قبلي
بس مايمنعش اني اقوله تاني
انا شايفه ان اساس المشكلة تكوينة أو تركيبة دماغ المواطن المصري نفسه
يعني المدخلات اللي بتدخل دماغه وهو طفل وتطلع في صورة مخرجات تتمثل في تصرفاته كمواطن ناضج وللأسف مافيش تغذية عكسية
المدخلات دي بتبقى في الغالب ناتج الظروف او البيئة اللي اتربى فيها واللي بيقوموا بعملية الإدخال دي هم الأهل والمدرسة ورجال الدين
الأهل فحدث ولا حرج بيسقوا ولادهم العنصرية والتمييز وكراهية الآخر بالمعلقة.. والمدراس ونظام التعليم مش بس هقولك انهم بيفصلوا الطلبة المسلمين والمسيحيين عن بعض في الفصول.. ده غير التفرقة في المعاملة بين التلاميذ بالإعتماد على كون المعلم مسيحي أو مسلم وكون الطالب ايضاً كذلك.. عايزه اقولك ان في مدراس بتمنع التحاق طلبة مسيحيين بها من الأساس.. وكذلك مدارس قبطية تمنع التحاق طلبة مسلمين بها من الأساس
ده غير بقى رجال الدين..اساس البلاء.. سواء مسيحي أو مسلم
المسلمون سابوا كل ايات التعايش في القرآن والأحاديث ونسوا النماذج المشرفة للتعايش وقبول الآخر على مدار القرون السابقة.. ومسكوا كل مايحض على القتال واشعال الفتن وإن الدين عند الله الإسلام.. ودول كفرة.. والجنة بتاعتنا لوحدنا.. وحاجات زي الولاء والبراء..والدعوة في مقابل التبشير.. وغيره وغيره.. وتسمعي وتقري كتب لناس فيهم بتقول دول بيكرهونا وبيخططوا علشان ينصروا مصر بأكملها.. والقسيسون في العالم كله بيلبسوا ابيض وفي مصر بيلبسوا اسود من ساعة مادخلها عمرو بن العاص.. وحالفين مايلبسوا ابيض الا لما يحرروا مصر من الإسلام تاني.. ده غير المخططات والمؤامرات اللي بيقوم بيها رجال الكنيسة علشان يحققوا حلمهم ده.. وبيستعينوا بالأمريكان على المسلمين.. إلخ من هذه الخزعبلات اللي للأسف بتجد طريقها لقلب وعقل المصري البسيط
والمسيحيون برضوا غضوا البصر عن كل مايدوعوا للتعايش السلمي وسعوا الى تشويه الإسلام ورسوله..وشحن القلوب بالضغينة والكراهية ضد الآخر على غرارالبلد دي بلدنا.. واحنا اللي اقباط وهما-المسلمين يعني- اولاد اعراب وهما اللي جم واحتلونا واستعمروا المنطقة فكرياً..ده غير انهم اصلاً بيشحنوا قلوب المسلمين بالكراهية ضدهم بالسخرية من ثوابتهم والعمل على تشكيكهم في دينهم
تلاقي قنوات فضائية ومواقع على النت وحملات تبشيرية
والنتيجة ان الطرفين دلوقتي مش طايقين بعض.. والكراهية تولد كراهية..والعنف- اللي هو الترجمة الطبيعية المنتظرة للكراهية- بيولد عنف.. والتعصب بدأ يسيطر على العقول او يلغيهابمعنى أدق.. وياريته أي تعصب..ده تعصب ديني..اوسخ تعصب ممكن يأدي لأبشع نتائج
أما العلاج بقى.. ده فعلاً اللي مش قادرة احدده.. هو احنا المفروض بندور هنا مع بعض على العلاج..طبعاً اهم خطوة فيه هتكون المصارحة والحوار.. وبعدين التوعية..الباقي مش قادره احدد فعلاً
كل اللي اقدر اعمله دلوقتي..ان احث اكبر قدر ممكن من الناس على المصارحة.. واني انا نفسي ابدأ بيها وافضيها من أي ضغائن او كراهية للآخر واكون بنفسي نموذج للتعايش السلمي والمواطنة وقبول الآخر.. وطبعاً اربي ولادي على كده.. وأوعي الناس اللي في دائرة معارفي بكده
همممممممم
مش عارفه المفروض اعمل ايه تاني..ياريت تعرفوني
كل اللي اعرفه ان احنا وطن واحد وجرح واحد..ارض واحدة بتجمعنا كلنا لاهينفع المسلمين يبيدوا المسيحيين ولا هينفع المسيحيين يبيدوا المسلمين..ليه بقى بنعمل في نفسنا كده
:(
اتمنى ما أكونش صدعتكم برغيي

ibn_abdel_aziz said...

المشكلة في فهم المسلمين لفكرة
الأممية في الاسلام

المسلم بيتعلم من وهو صغير
ان اي مسلم في الشرق هو اخوك في الغرب

ده مش وحش
بس من غير ضابط حيبظوط الدنيا

لان المسلم بيفكر كدة
بيفتكر ان لو مسيحي في الشرق ضرب مسلم
يبقي المسيحي اللي في الغرب متفق معاه
ليه؟
ما هو اصلهم امة برضك
زي المسلمين يعني

يعني لو انا امة
وانتم امة
يبقي لو واحد من امتك ضرب واحد من امتي
يبقي حطلع ....كل الناس اللي ف امتك حتي لو ملوش صالح ولا ليه دعوة

طبعا ده سببه ان مفهوم الامة اختلط بمفهوم البلطجة والصياعة والعصابة

الغريب ان لم اسامة بن الحاج لادن
ضرب الابراج
وطلعوا شوية مهابيش من الغرب قالوا المسلمين كلهم زي اسامة
كل مسلمين العالم قالوا لأ
ده افترا

اسامة ده حاجة واحنا حاجة
والاسلام مش بتاع اسامة

يبقي كمان المشكلة في مفهوم الامة بس
لا ده كمان انه وان واي
مش تو واي

ليه؟
لان فيه حاجة تالتة
اسمها
اللي ميقدرشي علي الحمار يقدر علي البردعة
The weaker link

لو رئيسي في الشغل هزقني
اطلعه علي مين
مراتي
او عيالي
ولو قوي عظمي زعلتني
اطلعه علي مين
علي اقليتي اللي ف بلدي

ولو ماما اتخانقت مع بابا
وحد فيهم غلطان
اروح اضرب مين؟
اختي

دي اخلاق العبيد
للاسف
احنا عايشين باخلاق العبيد

ibn_abdel_aziz said...

فيه حاجة تانية
المسلمين اللي حاسين باضطهاد الغرب ليهم
اكثرهم مش في الغرب
انا عشت ف امريكا ست سنيين وعارف

اه ساعات بشوف قرف وتضييق
بس باخد حقي

بيتهيالي الشعور العام لدي المسلمين بان فيه مؤامرة عالمية حتلاقيه مشعشع
في دول زي مصر
لانه معندوش تفسير تاني
ولان التفاسير بتقدم ليه جاهزة
من الاتجاهات الدينية والقومية والعروبية

وبالتالي بننسي ان ده بيسبب تراكم في العقل الجمعي للامة
اللي بيؤدي الي تفريغ شحنات غضب في اقرب شخص اصب عليه غضبي

المسلمين برة وبالرغم من بعض المضايقات
هم في حال افضل الف مرة من حالهم داخل دولهم التي تحكمها الديكتاتورية

انا لا ابرر امبريالية امريكا
فانا ضدها

لكن
الحق يقال
ودي وجهة نظري

ان المسلمين برة مهما عانوا
فهم افضل حالا بكثير جدا
مما لو عاشوا في بلاد هم فيها اغلبية

ibn_abdel_aziz said...

حاجة كمان
امريكا دولة لها مصالح
فهي التي حثت تركيا علي الا تعترف بمجازر الارميينيين المسيحيين عشان الاتحاد الاوروبي اشترط كدة علي تركيا
وبهذا تكون امريكا نصرت تركيا المسلمة علي ارمينيا المسيحية

امريكا بتطلع عين فنزويلا رغم ان الاغلبية العظمي كاثوليك
يعني مسيحيين

وهي التي فضلت ان تكون في صف النظام الديكتاتوري الاندونيسي وهو طبعا رئيسه مسلم
ضد الاقلية التيمورية الشرقية التي طالبت بالاستقلال
وهي مسيحية بالطبع

زي منتو شايفين
امريكابتلعب مع الكل
وهي تلعب بورقة الدين حين تكون الفائدة

هي ليست دولة دينية
ولا تمثل المسيحية
ولا تحكمها اخلاق المسيح
خاصة في سياساتها الخارجية

هي دولة علمانية
امبريالية
وفقط

amr220 said...

الاستاذة الفاضله نواره
و كل الاخوه المحترمين المسلمين و المسيحين

وصلني رد من اخ قبطي علي مدونه التهييس الشعبيه و احب بعد اذنكم اني انشره هنا و ارد عليه
و اليكم رده بالكامل



مجهول يقول...
يا معلم يا بتاع
"""""لانتي حتبنيلهم كنايس
و لا هما حيبطلوا يسبوا دينك و اليوم اللي شافوا المسلمين فيه
الاستاذ اللي سايب ميل""""""
انا مسيحي و بقولك من نفسي اسألك سؤال من نفسي:
و حياة عنيك و عافيتك يا أخي و دينك اللي انت محروق قوي من اللي عايزين يبنوا كنايس
إحنا اللي بنقول ورا شيوخ الزوايا كل يوم جمعه آمين لما بسلامته يدعي
اللهم يتم اطفالهم و إنصرنا علي اليهود و النصاري و أعداء الإسلام؟!!!!!!!!!!!! ولا انت مش بتصلي الجمعة أصلاً و احنا بس اللي بنسمع الكلام ده ولا هتقولي إني بألف قصص و حواديت
لو مسمعتش شيخ بيقول كده إخطف رجلك للمعصرة ولا دار السلام ولا حدايق المعادي و اسمع من الدعا علينا من المنقي يا خيار علينا و علي عيالنا و ستتاتنا و اللي خلفوا اللي جابونا الأحياء منهم و الأموات مع إن الميت ماتجوزش عليه غير الرحمه!!!!!!! ولا الموضوع ده كمان متعرفوش
انتوا عاوزينا نصدق مين و عاوزينا نصدق ايه؟؟؟ انكم بتحبونا!!! هأوووووو كان زمان
المسلمين مابيشتروش غير من المسلمين و ما يشغلوش غير المسلمين و الكلام ده حصل معايا شخصياً و و الله مش مره واحده!!!! لو مش مضطرين و مش قادرين تحركوا اللي ماسكين الإقتصاد زي الجواهرجيه و رجال الأعمال و الصيادله الي آخر اللسته اللي انت عرفها من الأعمال اللي إحتكرها المسيحيين كان زمانكم رميتونا في المالح من زمان انتوا بتعاملونا أوسخ من معاملة اليهود يا مؤمن!!!!! و للأسف الإنكار مش هايفيد ان ده مش صح إلي آخر الكلام الفاضي ده
انتوا بتكرهونا و عاوزينا نطفش من البلد علشان ده هو النصر علي أعداء الإسلام و نصرة دين الله مع إن ده مش صح بس انا هقولك ده بعيد عن أحلامك؟؟!!!!!! ولا هايحصل و لو حكمت آه أمريكا إحنا بالنسبالها مسمار جحا و بقولك إحنا ده بالنسبه لنا مصلحه
آه مش عاوزينا تحتل البلد أصلها بلدنا برضه بس من وقت للتاني قلمين علي وش العالم اللي زيك كده يفوقوهم علي فكرة انا مرحتش امريكا قبل كده و مش بحبها قوي كده زي ما انت طبعاً هتقول و تقول بصوا المسيحيين بيفكروا إزاي، لأ فوق و شوف ايه اللي وصَّل الحال لكدة فكر شوية قبل ما تسخن و تشتم و تزعق
عاوز اسأل سؤال كمان - معلش طولت عليكوا شوية بس القهر اللي الواحد فيه زاد عن الحد::
بعد ١١ سبتمبر لما مسيحيين مصر بيروحا امريكا مثلاً يعني مبيتبهدلوش تفتيش عشان من مصر يعني؟؟؟؟؟؟
زيهم زي المسلمين و اكتر عشان بشكوا انهم يكونوا مزورين ورقهم و تفتيش ذاتي و كل اللي قلبك يحبه ده غير اللي بيتعمل في الناس اللي هناك من العرب محدش بيسأل ده مسلم ولا مسيحي كله بيتاكل في الرجلين و بعد قانون مكافحه الإرهاب أحمد زي مينا كله هايتلم و بعدين نشوف

سؤال كمان:
لو إفترضنا هزلاً و ليس جدياً ان وزارة التعليم العالي و الواطي و اللي في النص قررت تحط محفوظات من الإنجيل في اللغة العربيه ، هل هايوفق الأزهر؟؟؟؟ و الإخوان و اللي مش إخوان و أي عابر سبيل مِعدي في الشارع؟؟؟؟
و الله اللي عمره ما دخل جامع حتي مش بيصلي البلد كلها هتتوحد لهدم الكنائس مش مظاهرات بس؟؟؟
إشمعني إحنا ولادنا من قدم الدهر لازم يحفظوا آيات من القرآن
( بجد مع كامل إحترامي))))))ـــــ))))----
هل هذا منطقي؟؟؟؟؟ هل لازم في إمتحان آخر السنه أكتب أول ورقة الإجابة بسم الله الرحمن الحيم و إلا ابقي من المشركين و الكفار اللي مستنيين نصر ربنا عليهم
ما الذي يمكن أن يتعله و بفهمه الطفل المسيحي من أنه مضطر ان يحفظ آيات من دين ليس دينه؟؟؟؟؟؟؟
ردوا عليا...... بجد
هل هذه حضاره؟ هل هذا من التي هي أحسن؟!!! بجد يا جماعه؟؟؟؟
مش هاتكلم عن الوصول لمناصب حك،ميه او في الشرطة أو في الوزارات السيادية أو لا سمح الله الجيش أو حتي المحافظين لحسن تقولوا عليا ده شكله أهبل
نواره اهو واحد مسيحي رد هتشتميه ول هتلغي الرد بتاعه
؟؟؟؟؟؟؟؟
شكرا و ربنا يعينك علي الوطن بالله بجد
معلش معرفتش أعلق هناك عشان معنديش الفيتيشن
تحياتي يا نواره
و بجد انا يحب مدونتك قوي و بحترم آرائك جدا بس ده اللي جوايا انا مسيحي و بجد مش عشان مدنه انا ٩٠٪ من آصحابي مسلمين ولاد و بنات

16 يونيو, 2007 03:34 م





و ردي المتواضع كما طلب مني بدون ماشتم و اسخن و ازعق علي حد قوله


بسم الله الرحمن الرحيم
اولا - الدعاء في المساجد علي اليهود و النصاري . . . سيدي الفاضل . . الدعاء علي اليهود سببه اعتدائهوم علي ارضنا و اخواتنا في فلسطين و لبنان و سوريا . . و مصر و الاردن و العراق و تونس سابقا
اما الدعاء علي النصاري فليس المقصود به الاقباط , المقصود به المسيحين اللي عمالين يموتوا في المسلمين في افغنستان و العراق و الشيشان و البوسنة و الفلبين
هل سعادتك سمعت اي حد بيدعي علي الاقباط؟؟؟

ثانيا - موضوع اذا انا كنت بصلي الجمعه و لا لاء دا موضوع مايخوصكش . . انتي مالك اصلي الجمعه و لا مصليش؟ متحشرش نفسك في اللي مالكش فيه . . يا اخي

ثالثا - سيادتك بتقول في اول ردك ان المسلمين بيكرهوكم . . و في الاخر بتقول انه %90 من اصحابك مسلمين . . طيب مش شايف ان سيادتك كده اما كذاب اما منافق؟
لو كانوا بيكرهوك كانوا حيصحبوك ليه؟ ولما انت عارف انهم بيكرهوك . . طيب بتصاحبهم ليه؟

رابعا - سيادتك بتقول ان المسلمين مابيشتروش من المسيحين . . و الكلام ده طبعا كذب . . لانه مش معقوله تكبروا و تربربوا في بلد فيه %95 مسلمين اذا كانوا المسلمين ما بيتعملوش معاكم . . ولا راي سعادتك ايه؟

خامسا - بتقول اننامبنشغلكوش . . يابني با حبيبي امال المسيحين اللي في مصر دول بيشتغلوا فين؟ كلوهم بيشتغلوا لحساب الكنيسه؟ انا كان ليا الشرف اني اعين 4 مسيحين و كنت كل يوم اروح اتعشي معاهم

سادسا - بتقول انه لولا انكم ماسكين الاقتصاد لا كنا راميناكم في المالح . . طيب هو مين اللي سابكم تمسكوا الاقتصاد؟ مش المسلمين؟ ياعني احنا غالطانين اننا ما عملناش فيكم زي حبايبكم الامريكان ما عملوا في الهنودالحمر او حبايبكم اليهود ما عملوا في الفلسطينين؟ بلاش دول عشان ما تزعلش . . طيب ايه راي سيادتك في المليون مسلم اللي المسيحين دبحوهم ايام محامكم التفتيش في اسبانيا؟ . . او المليون مسلم اللي قتلوهم المسيحين في الجزائر؟ . . طب بلاش دول . . سيادتك عارف كام مسلم اندبح ايام الحملات الصليبيه الخمسه؟
و مع ذلك سيادتك و اجدادك كنتم في ارض المحروسه . . محدش بيجي جنبكم

سابعا - سيادتك بتقول اننا بنطفشكم من البلد . . يا حبيبي انتم اللي بتمشوا بمزاجكم . . و بتروحوا تعيطوا في السفارات .. اضطهاد اضطهاد .. عشان المسيحين التانين يحنوا عليكم بقرشين و يا حبذا فيزا هجرة كمان . . مفيش كرامه . . حاجه تكسف و الله

ثامنا - بتقول ان امريكا عاملكم مسمار جحا . . الحمدلله انكم عارفين مقامكم في امريكا . . كل الموضوع ببساطه انه الاقباط سمعوا ان امريكا حتحارب المسلمين ايام 11 ستمبر . . فا فرحوا و زغرتوا . . و افتكروا ان امريكا حترجع لهم بلدهم اللي احتلها المسلمين من 1400 سنه . . . ههههههههه . . و النبي دي مش سذاجه؟؟؟ هههههههههههه

تاسعا - بتقول سيادتك انه قلمين علي وش العالم اللي زيي عشان يفوقوني . . هههههههههه . . يا واد يا كفتس يا بكاش . . . هو مين اللي عمال يتلطش له في مصر؟ اللي زيي؟ و الا اللي زايك؟

عاشرا - تعبت قلبي منك لله
الاقباط لما بيجوا امريكا . . بيعدوا يعيطوا انهم مش مسلمين و انهم يا حرام هربانين من الاضطهاد في مصر . . والله منظرهم بيقطع القلب يا حرام . . اصلهم بيصلبوهم في شوارع المعصره و دار السلام و المعادي

يلا ما علينا . . صديقي و اخي القبطي . . ايوه ليك حقوق . .و احنا معاك . . بس لزم تعرف و تقدر انك عايش في بلد %95 مسلمين . . و غزاه كمان عشان ما تزعلش . . السبعين مليون دول قاعدين ومهييسين علي راي واحده صاحبتنا . . ليا طلب عند سيادتك . . و حياه النبي دانيال . . ما تتاكش علي الميت . . لا يزارط في وشك . . الادب فضلوه عن العلم


الا ستاذ اللي سايب ميله

.:.-=- ELGaZaLy-=-.:. said...

ممتاز يا نوارة

سيبينى يومين اقرا البوستات كلها وهبداء اكتب رايي فى الموضوع كلة

جبهة التهييس الشعبية said...

انا ح انشر الرد ده بوست يا عمرو

ومش عارفة انت زعلان منه ليه

طيب ممكن تشرح لي وجهة نظرك؟

هو زعلان من حاجات بتحصل فعلا

ما ردتش عليه ليه من غير شتيمة بس ولا زعل انت كمان

ممكن تحط نفسك مكانه وتقولي احساسك ح يبقى ايه

Mohammad said...

أنا مستعجب على شوية حاجات نفسي حد يجاوبني عليها:
بس الأول أقولكم اني مسلم علشان يبقى موقفي واضح
1- ازاي لسة فيه حد من المسلمين بينكر ان المسيحيين في مصر موش واخدين حقهم. (ما حدش يرد بمنطق الوزيرة و النبي لأنه منطق مغلوط)
2- المشكلة الكبيرة ان الناس - الشعب نفسه بيمارس التمييز في كل القرارات الصغيرة و العبيطة قبل القرارات و التعاملات الكبيرة زي تغيير الدين و قبول الوظائف.
3- ما حدش يقدر ينكر ان مساحة التمييز و ثقافة التمييز بتنتشر يوم بعد يوم. من سنين ما كنتش أسمع عن حد بيقول ما تردش السلام على المسيحي و ما تعيدشي عليه.... النهاردة الآراء دي موجودة و مسموعة زي انتشار الحجاب و النقاب. و دة بيدل على ان الفكر دة بينتشر و بيطلع في شكل معاملات.
4- فكر التمييز و الانفصال من الطرفين - طبعا أنا بأسمع من طرف واحد بس من الواضح ان المسيحيين عندهم برضه انتشر التطرف. يمكن من باب رد الفعل و الدفاعية ... بس موش ممكن الانكار انه من الطرفين.
5- في ظل الضعف الشديد اللي بتمر به الحكومة و اللي أثر على وضع الدولة ككل و أدى الى طغيان الحلول الفردية و العرفية و سيطرة قانون الغابة بسبب انسحاب دور القانون من حياتنا ... أشك ان الاجراءات القانونية ستؤدي الى الى محاربة التمييز. القانون بلا تطبيق سيظل حبر على ورق. و اذا كان من أحرق و دمر لم يأخذ عقوبته التي يستحقها و تنازلت الضحية عن حقوقها طوعا أو كرها فلا ننتظر دورا للقانون في هذا الشأن.
5- في رأيي موضوع التمييز بسبب الجهل الشديد .... لازم يبقى فيه حرية للمسيحيين يتكلموا عن أنفسهم بحرية و شفافية و لازم المسلمين اللي بيؤمنوا بحرية العقيدة يناقشوا المسلمين اللي موش بيؤمنوا بيها .... لازم نتكلم مع بعض بصراحة و شفافية عن اشاعات الكنائس اللي بتجمع و تخزن الاسلحة و عن التبشير في المناطق العشوائية و غيرها من المواضيع الحساسة.
6- لازم يبقى عندنا الشجاعة و الحرية نتكلم مع رجال الدين و ما نبقاش بس متلقين عنهم. مين مننا بيناقش الشيخ في اللي قاله في خطبة الجمعة؟
الحقيقة أنا من الناس اللي ما بيسكتوش و كان لي قصة تضحك حاحكيها مرة تانية...
7- لا بد من الاعتراف انه لا بديل للتعايش لأنه عبر التاريخ لم يختفي شعب من الشعوب و لا جماعة من الجماعات المعروفة مهما بلغ الاضطهاد.

و أخيرا ... أنا سعيد بالحوار معاكم كلكم

amr220 said...

مجهول said...
انا المسيحي المجول كالعادة
يا عم الاستاذ اللي سايب ميله
انا مش بحب زكريا بقلظ و لا بحترمه و الله لانه مش بيحترم المسلمين و بجد أسلوبه مش محترم في الحوار و هذا غير مقبول ده اولاً
ثانيا انا من طائفة أخري غير طائفة زكريا و لست من هواة الكروت
ثالثاً أعتذر عن الإساءة الغير مقصوده لشخصك و لكن انت متضايق او هكذا يبدو من إسلوبك!!! لماذا لا تريد أو توافق علي أن أرد عليك علي نفس المستوي من الغضب؟؟؟؟؟؟

انا مش بعيط من الضرب في مصر و لو انا و انت وقفنا جنب بعض في مظاهرة هنضرب احنا الاتنين لا هايفرق مع اللي بيضرب مين مسيحي و لا مين مسلم و انت عارف كده كويس
و انا مش موافق علي اللي بيعملوه بتوع المهجر دول عالم بتجعجع و هما مش شايفين حاجه أصل اللي حاطط صباعه في طيظ غيره يدوس أوي يا معلم

عموماً احب اقولك إني مش صايع و مش من هواياتي الجعجعة بلا طحن و انا بحترم رأيك لأنك في حاجات كتير عندك حق كرد فعل لما يفعله اقبط امريكا و زكريا تحديداً، و لكن اتمني ان تغير رأيك في ان ما يفعلونه يجب ان ندفع نحن ثمنه،
شكراً لِسعة صدرك،
تحيات.





amr220 said...
الاستاذ المسيحي المجهول

اعتذارك مقبول و انا كمان بعتذر عن اي اساءة غير مقصوده لشخصكم الكريم

انا واحد من الناس اللي عمري ما بصيت مين مسلم و مين مسيحي و كنت دايما مؤمن بانه الدين لله و الوطن للجميع
و عند صاحب قبطي بيحبني اكتر من اي صاحب مسلم تاني

ايوه . . الاقباط ليهم حقوق . . و عندهم مشاكل . . و من حقهم يبنوا كنايس . . امال يصلوا فين؟
و من حقهم يشتغلوا في اي وظيفه تعحبهم . . زي اي مسلم
و مفروض كمان المسلمين يكون عندهم شويه ذوق و يبطلوا دعاء علي النصاري

و كمان مفروض انه يتم توعيه بعض المسلمين الجهله اللي عاملين فيها الشيخ الشريب و عاوزين يدبحوا في خلق الله

و اخيرا و ليس اخرا . . نفسي اشوف قداسه البابا شنودة و كبار الاقباط . . بيدينوا كلاب المهجر . . و زكريا السافل . . اللي عاوزين مصر تنضرب بالصواريخ . .


الاستاذ اللي سايب ميله

Incomplete said...

هيييييييييييييييييييييييه
أنا مبسوطة قوي باللي وصل ليه عمرو والمسيحي المجهول بالحواااااار
هييييييييييييه
ياريت كل المصريين يبقوا كده زيهم
يااااااارب ساعدنا

amr220 said...

الاستاذه الفاضله نواره
مفيش بيني و بين الاستاذ المسيحي المجهول الا كل خير
و احنا متفقين علي اغلب النقاط اللي اتناقشنا فيها

ابقي بصي عل الميل بتاعك

عمرو

amr220 said...

مجهول said...
صديقي:) الاستاذ اللي سايب ميله
تيجي نبقي اصحاب!!!!!! و الله العظيم ما بهزر!!!! و ندي العلم اللي بتقرا دي درس في ابسط آداب الحوار،
صدقني بتكلم جد
انا كمان عمري ما بصيت علي مين مسيحي و مين مسلم
طول عمري معظم اصحابي مسلمين، طول عمرنا عادي ملناش فيه
كل واحد حر يعمل اللي عايزه - دينه و اللي بينه و بين ربنا و هو مسؤل عنه-
انا المسيحي الوحيد في الشغل بتاعي علي حوالي ٥٠ زميل كلهم مسلمين و هزارنا كله علي الموضوع ده،
كل ما حد يهزر معايا اقوله هاخبط دماغي في الحيطه و اطلع علي امن الدولة أوديكوا كلكم في داهية و قانون الطواريء في صفي و انا اهو و انتوا اهو -
طبعاً كل ده هزار و ضحك ولا في حساسيات و لا اي حاجه، بجد الموضوع سهل
المشكله في الجهلاء من الجانبين
جهلاء المسيحيين لديهم مشكلة هواية الإنسحاب التي زادت بعد إنعدام فائدة المواجهة سواء مع الأفراد او مع الحكومة و الحركات بتاعة فطار رمضان اللي كل يوم في حتة كلنا عارفين إنها عدة النصب!!!!! و من ناحية أخري - حلوه دي مديه علي قناة الجزيرة شويه- جهلاء المسلمين اللي بيدعوا علي المسيحيين و يسخنوا الناس عليهم و الناس -البسطاء منهم فقط طبعاً و ليس المتطرفين- بيسمعوا و من غير تفكير هوب حريقا
الحل إيه؟!!!!!! من وجهة نظري المتواضعة
إن الناس اللي عاوزة تحل من الطرفين يتكلموا مع بعض من غير رقابة الوصاية من الشيوخ و القساوسة
بجد هما لا بيحلوا ولا يربطوا دي عالم ادمنت السلطة عاوزينا زي الغنم يسوقوها شمال شمال يمين يمين،
قولي ايه رأيك؟؟؟؟؟
و رد عليا
الاستاذ المسيحي المجهول
علي فكره عجبني قوي اللقب ده واضح انك مثقف ان هامضي بيه في اي حاجه بعد كده بجد!!!!!

18 يونيو, 2007 09:51 ص


مجهول said...
نواره
انتي سايبانا نتكلم و مش بتبصي علي التعليقات ليه؟؟!!!!
فاتحاها سبيل كلام ماتفهمينا فتحتي الموضوع و نمتي ولا ايه!!!
و الله شكل مدونة عم احمد هاتاكل منك الجو،
ردي عليا انا و صديقي المستقبلي الأستاذ اللي سايب ميله من فضلك بس بعد ما تقري كل اللي احنا الإتنين كتبناه لو سمحتي
الاستاذ المسيحي المجهول كالعادة

18 يونيو, 2007 09:56 ص


مجهول said...
العزيز الستاذ اللي سايب ميله
انا لسه شايف ردك الل علي مدونه حوار حق
اللي فيه من اولاً لغاية تاسعاً
و عندي رد علي كل حاجه فيه بس نفسي نبقي أصحاب الأول و مستني ردك علي الموضوع ده الأول و بعدين بعد ما اعرف ردك نكمل كلام
ok????
انا كل اللي كان قصدي اقولهولك اني اقول وقائع حاصله في بلدنا و في رأيي الحوار مش لازم حد يكسب فيه بقدر ما نحاول نوحد الآراء و نقرب وجهات النظر مش إن حد يطلع كسبان و يبقي المنتصر الذي لا يقهر
و لا ايه رأيك؟؟!!!! بجد الأسلوب بتاع مين كسب في المناظره ده هو اللي خَرّب العلاقة بينا كلنا من ساعة ما بقي حد لازم يطلع كسبان،
و هذا رأيي
المسيحي المجهول عادة
ملحوظة
ارجوك بلاش كلام صعب في الردود
و لو سمحت من ديموقراطيتك انقل كل ردودي لمدونة حوار الحق و متشكر علي صبرك معايا ، انا عارف ان الكفاتسه متعبين قوي اهو من باب قبول الآخر:)

18 يونيو, 2007 10:30 ص


مجهول said...
الاستاذ المسيحي المجهول
اهلا بيك صديق عزيز و اخ فاضل للغلبان اللي سايب ميله

انا لسه فاكر لما كنت عيل صغبر في السبعينات . . ماكنش فيه حاجه اسمها اقباط و لا مسلمين
و كانوا جيرانا المسيحين كل يوم عندنا . . و احنا كمان كنا قرفينهم . . طول النهار نطب عليهم و ناكل عندهم . . اصل احنا عيليتنا تعز بطنها قوي
و كنا نروح الافراح في الكنايس و نروح حفلات الكريسماس . . و اختي شقيقتي متخرجه من مدارس الراهبات
كان لسه في خير . . كان حال البلد احسن ميت مره من الايام السوده دي
كان لسه في شقق . . و كانت الشوارع مش زحمه . . و كان الاكل ليه طعم . . و اغلبيه الناس بتحب بعض . . و كان لسه في ذمه و اخلاق
مكنتش تسمع حد بيشتم و لا بيسب دين في الشارع
و ماكنش حد خايف يروح القسم عشان يطلع بطاقه ولا يختم ورقه
كانوا ظباط الشرطه في حالهم و مكنش فيه تعذيب في الاقسام
و لما حصل موضوع الزاويه الحمرا مكناش فاهمين ايه اللي بيحصل . . عمرنا ما سمعنا عن مسلمين و اقباط يدابحوا في بعض قبل كده
و بعدين جا عمك السادات و قال انه الاقباط بيخزنوا سلاح في البدروم بتاع الكنايس . . و دقي يا مزيكا

و بعدين جا عمك حسني و قلب عاليها واطيها
اقسام البوليس بقت بتتنافس علي احتلال مركز الصداره في اهانه و تحقير و تعذيب المواطن المصري
ظباط البوليس بقوا قطاع طرق
و جاب كل الشباب اللي مش متعلم حطهم في الامن المركزي . . عشان يضربوا الشباب المتعلم اللي مش في الامن المركزي
والوزراء بيسرقوا . . و نواب مجلس الشعب بينهبوا . . و اي واحد شغال في مكتب حكومه فاتح الدرج و مستني المعلوم

و المسلم زعلان من القبطي . . و القبطي زعلان من المسلم . . و يا ريتنا حتي عارفين احنا زعلانين ليه

و بعد تفكير طويل . . اكتشفت حكمه و ذكاء و دهاء قس ابونا زكريا بطرس
هو اكيد عايز امريكا تضرب مصر بالصواريخ . . لعل و عسي صاروخ منهم ينزل علي اللي بالي بالك و يريحنا منه هو و المحروس الصغير . . يمكن مصر ترجع تاني زي ما كانت

اخوك
الا ستاذ اللي سايب ميله

18 يونيو, 2007 11:58 ص

amr220 said...

ايه يا ست نواره :)
شباكتينا في بعض و اشتريتي دماغك و خلعتي
طب احنا ذنبنا ايه ان الفلسطنين بيتخنقوا؟
تحرمينا من انس سيادتك ليه

وبعدين انا كان مالي و مال المدونات
انا كنت بتسلي عالنت و بالصدفه شفت المدونه بتاعتك
عجبني كلامك قلت اعاكسك شويه
والله الواحد قلبه بيفرح لما يلاقي بنت مصريه في ذكائك و قوة شخصيتك
ربنا يحميك ل اهلك و بلدك و الغلابه اللي بيسيبوا ميلهم

علي العموم الاستاذ المسيحي المجهول طلع راجل كله ذوق و قايم بحق الضيافه علي اكمل وجه و اداني امل كبير

و بالنسبه ليكي . . انا حاكنس عليكي السيده زينب و اقول لها . . ياموا العوازل . . نواره بنت ام نواره . . امنعيها من دخول المحاكم . . و باوزي الكمبيوتر بتاعها
و متشغليش الا الميل

الاستاذ اللي سايب ميله

AL-MASIHI-AL-MAGHOUL said...

مِعلمي الأستاذ اللي سايب ميله ولا اقولك عمرو و نِخلص
الكلام ده كان بعد السبعينات كمان و لسه لحد دلوقتي و هايفضل للأبد، الناس العاديه اللي زيي و زيك مستريحيين علي كده بس الفتنه و العنف هي اللي بتسخن الناس علي بعضيها
طول عمرنا عايشين في بيوت بعض و في الجامعه الشلل مافيهاش كلام فاضي من ده و احنا عيال كنا بنخش البيوت كلها عشان نعلق زينة رمضان في البلكونات و ده تحت و ده فوق و ماكانش فيه الكلام الفاضي اللي معمول ده،
كلنا متضايقين من الخناقات اللي بتحصل ناس تموت و ناس تتعور و قضايا و العيشه بقت خنقه خِلقه كله مضغوط دروس و مصاريف و عيال و زحمة
احنا في كل ده مع بعض
إشمعني سبنا كل القرف اللي احنا فيه مع بعض ده و مسكنا في الحاجه الوحيدة اللي احنا مختلفين فيها و اشمعني دلوقتي؟!!!!!!!! هاموت و اعرف
طب اضحكك
العملا بتوع الشركة كانوا قبل ما يعرفوا اني مسيحي كانوا قبل ما يصلوا يسيبوا ال٤٩ مسلم اللي في الشركة و يسألوني انا عن القبلة و كان المكتب كله بيضحك عليا لغاية لما سألت هي القبلة منين و بقي اللي يسأل أقوله و برضوا يضحكوا...... في الآخر قلتلهم يا اخواننا الصلاه علي النيه ..... مش كده ولا اييييييه
الله يرحم عمو فؤاد
سيبك انت احنا لو إتسبنا علي بعض هنعيش زي ما طول عمرنا كنا عايشين
و الدين لله و الوطن للجميع
و لو صاروخ جه من اي حته هايفرتكنا انا و انت
ولا هايفَرّق و هو نازل علي دماغاتنا مين مسيحي و مين مسلم البلد هاتخرب علينا كلنا
تحياتي

جبهة التهييس الشعبية said...

بالعكس انا مش شارية دماغي

انا مبسوطة ان بالحوار بنقدر فعلا نتوصل لحل وفضلت اني ما اتدخلش

على فكرة انا مبسوطة والحوار بينك وبين مسيحي مجهول دليل على ان لسة فيه امل

مين عارف

يمكن مخطط الفوضى الخلاقة يقف عند مصر وينهار زي ما حصل ايام سيف الدين قطز

مين عارف

يمكن مصر تنقذ بقية المنطقة

ويمكن توحلها

الله اعلم

بس حواركوا اداني امل

amr220 said...

الاستاذ المسيحي المجهول
ارجو انك ماتكونش زعلان من الكلام اللي انا قلته قبل كده
الكلام ده ماكنش موجه ليك و انما انا حاولت في الماضي اني اتحاور مع بعض اقباط المهجر . . و كانت تجربه مؤلمه

المهم . . احنا متفقين و بنطالب بالعدل و المساواه لاقباط مصر بدون اي تطاول . . لا علي الاقباط و لا علي المسلمين

و بنشكر نواره انها كانت السبب في صداقه جديده بين مصري و مصري

انا جاي مصر بعد شهرين و انشاءلله تكون فيه فرصه اقابلك و اعزمك علي حسابك . . بس يا ريت كباب و كفته عشان عامل ريجيم


اخوك
عمرو

AL-MASIHI-AL-MAGHOUL said...

عموووووووره،
هو كل ده يا قادر و انت بره مصر!!!!!!! حرام عليك اومال لو كنت في مصر كنت هاتعمل فيا ايه يا مؤمن؟؟؟؟؟
بتتكلم علي الحوار مع اقبط المهجر، اقولك انا
بنت عمي كان عندها ١٥ سنه، و كانت في اجازه هنا في مصر هي عايشه في امريكا من و هي عمرها ٤ سنين قشطه كده، مره في الأجازه قعدت انا و هي نتكلم و كانت يادوب ١٥ سنه الكلام دخ كان قول من عشر سنين، شبطنا في بعض سياسه لقيتها بتقولي كده و بالحرف الواحد:
you hate us because we have nuclear weapons
I REPLAYED:
who are we??? that you are talking about
she said we AMERICANS!!!!!!!
ساعتها بس عرفت ان الناس دي بتجعجع و هي ولا ليها في الطور ولا في الطحين بحقيقي.انا مبسوط ان احنا بقينا اصحاب بس برضه انا وعدتك بالرد علي النقط بتاعتك و انا هاعمل كده في كومنت بس مش ده
اما بقولك انا مستنيك في مصر و هاعزمك علي حسابي في المطعم اللي انت متعود تاكل فيه و بتحبه اول ما تيجي ولازم كباب و كفته اصل انا كمان عامل رجيم هاهاهاهاه
صباح الفل
أخوك المسيحي المجهول
نواره ه ه ه ه ه ه ه ه ه ه ه
تيجي معانا؟!!!!!!!.ههههههه

amr220 said...

الاستاذ المسيحي المجهول

اؤمال انت فاكرني زكي شان؟
يعني شايفني عمال اشتم في المحروس الكبير و المحروس الصغير . . و حاكون قاعدلهم في البلد؟ هههههههه
دنتا باين عليك طيب قوي

و بالنسبه لموضوع الكباب . . خلاص دا وعد
علي فكره . . انت مهندس معماري؟

و ممكن تراسلني علي star_light1006@yahoo.com

عمرو

AL-MASIHI-AL-MAGHOUL said...

عموره
هو عشان انت بره هاتموتني انا هنا؟؟؟؟؟
خلينا علي الميل احسن يا معلم هابعتلك ميل قريب قوي بجد و شكراً علي ارسلك للميل

AL-MASIHI-AL-MAGHOUL said...
This comment has been removed by the author.
AL-MASIHI-AL-MAGHOUL said...

يا جماعه انا لقيت شرح لنظرية الفوضي اللي بتقول عليها نواره في مدونه اسمها
CHAOS
اللينك بتاعتها اهيه للي عاوز يقرا
http://chaosalways.blogspot.com/2007/04/about-chaos-theory.html
تحياتي

جبهة التهييس الشعبية said...

ههههههههههههههههههههههه

هو انت خلاص بقيت المسيحي المجهول وده اسمك الرسمي

هاهاهاهاهاهاها

AL-MASIHI-AL-MAGHOUL said...

عجبتك اوي ها ها ها ها
هاتيجي تاكلي كباب معانا ولا لأ؟؟؟
و الله عجبني اللقب مع انه في الأول كان شتيمه يا نواره بس اهو ما محبه إلا بعد خناقة ها ها ها ها ها
قريتي اللينك بتاعة الفوضي؟!!!
اي خدمهردي علينا ايه رأيك فيما وصل الحوار!؟؟؟؟

amr220 said...

شاخدلي بالك انت انه الست المديرة بتطلع الكلام بالقطاره؟
دنيا حظوظ . . جاتنا نيله في حظنا الهباب

هات يا عم الكباب . . خلينا ننسا :)

AL-MASIHI-AL-MAGHOUL said...

يا معلم المديرين كلها كده
و كلام المديرين بحساب
ياللا إرجع عشان تاكل الكباب
ها ها ها ها ها
بقولك ايه، تيجي نشبط في بعض تاني يممكن المره دي نعرف نخليها ترد؟؟؟!!! مش كده ولا ايه

amr220 said...

اكيد فيه طريفه اننا نعرف نتكلم معاها
انا حافسيلها كاوتش العربيه
بتاعتها . . و استناها علي محطه الاتوبيس

جبهة التهييس الشعبية said...

ايه ده ايه ده

انتوا بتلونوا عليا

مش عارفة ليه حاسة ان فيه تريقة

واشمعنى انا اللي مستقصدني؟

مافيه ستميت مدير في ام البلوج ده

آه ده اضطهاد بقى

انا ح اطلب اللجوء السياسي لزنزبار

:)

AL-MASIHI-AL-MAGHOUL said...

العزيز عمرو
إسمحلي نكمل ما بدأنا من حديث، وعدتك بالرد علي التسع نقاط اللي انت كتبتهم مع مراعاة ان هذا رأيي المتواضع و هذا ما اراه و أعتقده:
١) موضوع الدعاء علي النصاري عقب صلاة الجمعه
ماليش دعوة باليهود، هل تعتقد يا عمر إن واحد من كفر ابو طشط ولا كفر أم الخلول في المحروسه هايعرف يفرق بين المسيحي اللي ساكن جنبه واللي بيقتل المسلمين في العراق و لا في البوسنه
ده مايعرفش يقرا يا عمر و اللي بيقوله الشيخ عبد البر يبقي صح - علي رأي عبد الهادي في فيلم الأرض- بجد الجهل هو سبب هذا الإنهيار و الحقيقة انا لا الوم المواطن المصري المسلم البسيط علي هذا و ما حدث في الدخيله اهه اللينك بتاعته
http://hwarhaq.blogspot.com/2007/06/blog-post_5387.html
و اكيد انت قريته و مِقدر
٢) سؤالي عن صلاتك للجمعه
اعتذر عنه و بشده و اسحبه اصلاً بعد إذنك
٣) عن المسلمين الذين يكرهون المسيحيين
هل تعتقد فيه حد عاقل بيصاحب متشددين مسلم كان او مسيحي إلا إذا توافقت الأهواء؟؟
العقلاء المعتدلين هم من يتصادقون إحنا متربيين علي الإعتدال في كل شيء و إنتوا كمان كده لكن تغير لغة الخطاب الدين من الطرفين خلقت جو من التحفز ضد الآخر فصارت نظرة الناس للغير محجبه مختلفه اصلها اكيد مسيحيه ـ غالباً- و برضوا التوجه الإسلامي للحجاب زاد شويه من فتره و بعدين تم السيطره عليه بإبعاد بعض الدعاه و انت اكيد فاهم انا بتكلم علي مين مع ان انا من رأيي ان هذا كان خطاء لكن اليومين دول التوجه ده قل
عايز أوصل من الحته دي لأن هناك مراقبين من فوق يتحكمون حتي في التوجه الديني للناس سواء بالحسني او بالقوه

٤) موضوع التعاملات الماليه بين الطرفين
انا مش عارف انت بره من قد ايه لكن خلال السنتين الخيرتين انا لاحظت ان التعاملات إختلفت جامد و التوجه عند الناس صار طائفياً في التعيينات و الشراء و البيع و بالذات في الإحتباجات اليوميه التي لا تنقطع لأنها مصدر إنفاق عالي كإحتياجات المنزلية و البقالة الخ هناك محلات معينه لتسوق الطرفين و إسأل و الناس تقولك لو انت بقالك كتير بره و لو حد بيقرا الكلام ده هنا ممكن يرد عليا ، الكلام ده جديد و علشان جو التحفز اللي موجود من الطرفين خدنا بالنا منه كلنا مسلمين و مسيحيين و إبتدينا ندعمه و نتعامل معاه علي انه ده الوضع القائم و اللي هايكمل

٥) مقوله ان المسلمين مابيشغلوش المسيحيين في شركاتهم
لأ مش كل المسيحيين شغالين لحساب الكنيسة لكن بصعوبة بيلاقوا شغل و كل الإستمارات للتقدم للوظائف بقي فيها خانة الديانه ليه؟!!!!
دي حاصله لا و لن يستطيع اي حد إنكارها و سبق و قلت لك انها حصلت معايا اكتر من مره و الحكومه عامله كده معانا في كل الوزارات السياديه و الشرطه و الجيش آخرها لسه ٦ جامعات متغيريين الرؤساء بتوعهم من يومين تلاته مفيش رئيس جامعه واحد مسيحي!!!!!
هل مفيش واحد مسيحي ينفع؟؟!!! لو حتي واحد
انت راجل عاقل و بتعيين مسيحيين شغال حلو و انا بقولك يا ريت كل الناس تبقي بتدي أولويه للكفاءة زيك بس هل ده بيحصل ......؟؟؟؟ في الحالات العادية اليوميه اشك

٦) موضوع احتكار المسيحيين لبعض جوانب الإقتصاد
لأ مش الحكومة اللي سابتنا لكن التوجه القائم بالإنعزال عن المجتمع الذي حدث بعد الثورة التي دفعت المسيحيين بعيداً عن كل ما سنق و اوضحته لسعادتك في النقطه السابقة فالنتيجة كانت هي التوجه للعمل الخاص الذي لا يخضع بالعلاقة المباشرة للحكومه و لكن لقوانين التجاره و الضرائب و بالتالي بمبداء التراكمات كانت النتيجة أن صارت هذه الأعمال و الوظائف و التخصصات بنسبة عالية للمسيحيين ما بين وراثة أو بالتبعيه
و معلومه ليك في كندا أعلي إعانه بياخدوها السكان الأصليين و كمان في استراليا
و ده كلام من مصادر موثوق فيها
انا معرفش كام واحد مسلم مات في الحملات الصليبية لكن اعرف ان القتل بإسم الدين هو أمر لا يرضي عاقل من أي دين

٧) عن هجرة المسيحيين من مصر
اللي بيروح يقدم ورق إضطهاد دين في أي سفارة بيتحط علي قوائم ترقب وصول و يمنع من دخول البلاد و انت عارف حبايبنا الحلوين ما بيرحموش حد في المواضيع دي
يعني اللي بيقول انا مضطهد بيعرف انها
one-way ticket
مين فينا بايع أهله للدرجه دي و إحنا - كمصريين- شعب عاطفي بالدرجه الأولي و أول ما بينفع نرجع زيارة اول حاجه بتتعمل هي زيارة مصر و اديك بره و عارف الهجره و البعد و الغربه طعمهم ايه؟؟؟!!!! ولا انت ناوي تكمل هناك

٨) امريكا و التدخل بحجة المسيحيين و حقوق الإنسان
لو انت مظلوم و مقهور في بلدك اللي معاك جنسيتها و جالك شيطان قالك هاجيبلك حقك
صدقني مش هو شيطان و انت عارف انه شيطان بس مادام هايجيبلك حقك هاتقولوا ماشي
و الساكت عن الحق شيطان أخرس، إحنا مش طالبين اكتر من حقوق المواطنه مش عاوزين ناخد حقوق المسلمين انت فاهمني؟؟
علي فكره انا مجبتش سيره احتلال المسلمين لمصر اللي انت قلت عليها دي من ١٤٠٠ سنه
انا مش ساذج زي ما انت قلت و أعتقد انك بدأت تقتنع بكده
احنا بنتكلم اننا كلنا نبقي في سلام مع بعض

٩) موضوع القلمين بتوع التدخل الأمريكي و ما يفعلوه تحت بند حقوق المسيحيين
القلمين مش لسيادتك اكيد القلمين للمتطرفين اللي بيسخنوا الناس علي بعضيها و بتجيلهم اواور بالصمت و الإمتناع عن إشعال الفتن في مواعيد معينه من كل عام و بالمناسبة
النهديد بقطع المعونه الأمريكيه يغير من بعض القرارات السياسيه و بجد سيبك من اللي بيقولوا مش مهم لأ مهم و لو المعونه اتقطعت هانتبهدل قوي قوي كمان مصر كلها هاتتبهدل مسلمين و مسيحيين
و إحنا في المركب سوا يا هانعيش سوي يا هانموت سوي
و انت قلت إن اللي زيي بيتلطشوا في مصر يا عم يا بخت مين بات مظلوم و لا باتش ظالم
و لينا رب إسمه الكريم
يا معلم انا سعيد بالعيشه في مصر ارجع أقف معانا نرجعها زي ما كانت لما كنا صغيرين
تيجي بالسلامه ان شاء الله
اعتذر للإطاله بس انا وعدتك ارد و وعد الحر دين عليه اتمني انك متكونش زعلت مني في اي جاجه و الكلام أخد و عطا
تحياتي

AL-MASIHI-AL-MAGHOUL said...

ما عاش و لا كان اللي يتريق عليكي يا ست الكل يا بنت عمنا كلنا و بلاش حكاية اللجوء دي تاني البلد دي أحسن من غيرها ، مقلتيليش هتيجي تاكلي كباب ولا لأ:)) دي مش عزومت مراكبيه ده بجد بس لما عمرو ييجي من امريكا

zenzana said...

ايه هو اصله دا؟
هو انا اطرح السؤال
وفي الاخر تعزموا بعض علي كباب من غيري؟
صحيح انتوا الاتنين تستاهلوا
خصوصا سي المسيحي المجهول دا
هو و عمرو
يلا بقي قولوا عليا عليا بضطهدكم

وكمان الست المديرة معاكم
مكنش العشم يا نوسا

amr220 said...

مين بس اللي مزعل المديرة و انا اكسره
دي ست بركه
يا حاجه نواره . . احنا كلنا رجالتك و تحت امرك
و بعدين احنا لا نعترف باءي مديرة تانيه
انتي ماما و انتي بابا و انتي كل حاجه حلوه عرفناها في حياتنا :)

يا عم المسيحي المجهول شوف لنا حته نستخبي فيها الله يسترك . . انا شايفها بتجز علي سنانها

amr220 said...

الاخت زنزانه . . كنت حاغلط و اكتب زننانه و بعدين لحقت نفسي

اهلا بيكي طبعا في عزومه الكباب . . انا مكنتش عاوز اروح بس اخويا و حبيبي المسيحي المجهول اصر علي العزومه و انه هو اللي يدفع الحساب بالكامل

يا ريت كده تجيبي معاكي كل اصحابك و اولاد عماتك و خالاتك و الجيران و تشرفونا في عزومه الكباب دي

و ياريت تجيبي معاكي ستنا المديره. . عشان الاكل يبقي طعمه احلي

:)

amr220 said...

الاخ المسيحي المجهول

انا خادتلك اجازة بدون مرتب عشان اعرف اقرا و ارد علي تعليقك
انت باين عليك عاوز تزوغ من عزومه الكباب بس مش حينفع لاني خلاص عزمت اختنا زنزانه و اصحابها و اهلها و جيرانها و كمان عزمت اختنا و كبيرتنا الاستاذه الفاضله نواره

اولا موضوع الدعاء علي النصاري ده عندك حق فيه . . و باعدين باين عليه بيجيب اثر عكسي
كل ما ندعي علي النصاري . . يبهدلونا اكتر
انا من هنا و رايح حدعيلهم . . مين عارف . . يمكن تصيب المره دي
بس بجد . . معاك حق . .

ثانيا يا عم انا كنت بجر شكلك . . تلاكيك يعني . . و بالتالي انا اللي مفروض يعتذر . .

ثالثا في مسلمين بيكرهوا المسيحين و العكس صحيح
اهو دول بقي
للاسف الكراهيه دي من اقدم طباع البشر . . بس بشويه توعيه و تسامح ممكن التقليل منها لحدود تتماشي مع قواعد العدل و المساواه و القانون
يمكن من اكبر الحاجات اللي بتعجبني في المسيحيه هي الدعوه للتسامح بعكس اليهوديه بتاعه العين بالعين

رابعا موضوع التعاملات الماليه ده عندك حق فيه برضه
انا مره شفت واحد قعد يلف بالعربيه ساعه لحد ما لقي صيدليه صاحبها مسلم عشان يشتري الدواء من عنده
بس كمان اعرف ناس كتير مبيعملوش كده
بس عموما عندك حق . . و يمكن المسلمين واخدين موقف من الاقباط . . خاصة في السنين الاخيره اللي اقباط المهجر اترازلوا فيها علي المسلمين

خامسا موضوع الشغل ده عندك حق فيه
بس دي مشكله عالميه مش في مصر بس
دايما الاقليات بتعاني من نفس المشكله بدرجات مختلفه
دي عامله زي مشكله الواسطه
ممكن جدا واحد مسلم ميلاقيش شغل عشان معندوش واسطه

سادسا انا مقلتش انك ساذج . . انا قلت انتي باين عليك طيب قوي
سيدي الفاضل . . في ناس كتير بتروح السفارات و تشتكي من الاضطهاد و منهم مسلمين . . اللي حارق قلبي انني شفت ناس بتكره مصر قوي . . هي البلد ناقصه مصايب
يعني بذمتك . . ايه شعورك و انتي بتتفرج علي التلفزيون و يطلعلك واحد مصري بيطالب امريكا بقصف مصر بالصواريخ

ثامنا ايه يا عم . . حاسب حاسب . . دخلت في العامود انتي كده
يا راجل حرام عليك . .في حد في الدنيا يروح يتفق مع بلد اجنبي ضد بلده و تقولي عشان ياخد حقه؟
خلاص . . مش مشكله . . انا حروح اتفق مع اسرائيل انها تضرب مصر عشان مش واخد حقي في التعليم و الرعايه الصحيه و فرص العمل و السكن و الانتخاب و حريه التعبير و حقوق الانسان و رغيف العيش و العيشه و اللي عايشينها

تاسعا سيادتك قلت قلمين علي وش العالم اللي زيي عشان يفوقوني قمت انا رديت عليك بانه مش انا اللي بتلطش

انا مش زعلان من تعقيبك . . انا خايف عليك و علي اخواتي
كلنا شفنا حصل ايه في العراق
مش عاوزين نشوفه في مصر
مفيش اسهل من توليع الحريقه
بس حتاخد سنين عشان تبني اللي اتحرق
دانتا مهندس و عارف قد ايه البنا صعب

اخوك
عمرو

AL-MASIHI-AL-MAGHOUL said...

صباح الفل يا عموره
بقا يا مؤمن انا أعزمك علي كباب هاتعزملي رابطة مدوني الفتنة الطائفية اللي في البلد كلها!!!
يا عم اللي عاوز يفنجر يفنجر من جيبه هيء هيء هيء
ولا عشان هي فلوس نصاري يعني ها ها ها ها ها ها
قول كده بقي يا عم بس انت هات نوارتنا و زننانتنا قصدي زنزانتنا و تعالي و الكباب عليا و المحامي عليكوا لو إتقفشنا سوي، سلومه لقرع ميعرفش ابوه ها ها ها

amr220 said...

يا عم مش مشكله كام الف جنيه في عزومه كباب
انتوا فلوسكو كتير
و بعدين احنا مش لينا جزيه عندكوا؟

طب خلاص ماتزعلش . . حنعفيك من الجزيه . . و الحساب كله عندي . . و لو اتمسكنا . . حقول لهم انه انت كنت بتحاول تنصصرنا . . ابسط يا عم . . اسمك حيطلع في الجورنان
:)

AL-MASIHI-AL-MAGHOUL said...

انا كنت عاوز اقول حاجه معرفش حد فكر فيها قبل كده و لا لأ! انتوا عارفين ان المسلمين أقرب للمسيحيين من اليهود؟؟ لأن المسلمين مؤمنين ان المسيح جه الأرض - بغض النظر عن حيثيات الحكم - اليهود لأ اليهود مؤمنين انه لسه مجاش و ده السبب انهم بيكرهوا دول و دول لأن ده عكس كل معتقداتهم..... اما عن الست نواره اللي انا فقعتلها مرارتها
يا ست الكل احنا اللي بنتحايل عليكي تتحشري في الحوار ما اقصده بالشأن الداخلي للمسلمين و الشأن الداخلي للمسيحيين هو ان هذه امور دينيه الغرض منها التوعيه و
ليس ولا يجب ان يكون لها علاقه و لا تخضع لسلطة الدوله عملا بمبداء
إعطوا مال قيصر لقيصر و مال الله لله
من ناحيه تانيه المعسكرات دي اللي بتتعمل للشباب لازم يكون القائمين عليها ناس ملتزمه تقوم بتوعيتهم بأن هذا وطن واحد لنا جميعاًو ليس تحريضهم علي التطرف و الإنسحاب و مشكلة الإنسحاب في الكنيسة المصرية قديمة قِدم الدهر لانها صول عمرها كانت تابع للسلطة الحاكمة (اياً كان توجهها)و هذا جعل الإستقلال عنها غير ممكن
يا نوارة احنا بنتكلم في حاجات مر عليها فوق ال ٥٠ سنه لا من السهل تغييرها و لا هاينفع مقاومة كل ما تعودنا عليه كلنا هذه امور تعديلها يتطلب وقت اطول من تأسيسها من الصفر التعديل صعب!!!!!

اما عن مني الشاذلي فمن حقي ان اختلف معكي في توجهات حوارها و اسلوبها في اي امر له علاقه بالمسيحيين !!!! و مش مره ولا اتنين لأ انا بحس انها بتتحامل شويه فاضل عليها تقولنا بوسوا ايديكوا وش و ضهر انكوا لسه عايشين لأ بقي اسمحيلي ده هو اللي بيوصلني منها سواء بالتصريح او التلميح في معظم الأحيان
موضوع ساويرس بقي له قصة اخري: اولاً
هو مفيش غير ساويرس اللي معاه ١٠ مليار دولار؟؟؟ و بعدين يا ستي اللي عطاه يعطينا شغله هو و ابوه و اللي يعرفه علي الأقل بتوع الكسب المشروع و لا المدعي الإشتراكي مش ماسكين عليه قواضي
كام واحد في بر المحروسة معاهم عشراااااااااااات المليارات و من الكسب الغير مشروع و أوامر الإسناد المباشره و المناقصات المقفوله و برضه اللي بياكلوا زباله هايفضلوا ياكلوا زباله و بعدين تعالي هنا هو المسيحيين بس هما اللي بيشربوا الخمره بتاعت ساويرس ؟؟؟؟؟ يعني هو فتح مصنع بيره علي المسيحيين ولا بيبيع البيرة ببطاقة التموين ولا بالبطاقة الشخصيه
يا نوسه صدقيني انا مش بشرب خمرة اصلاً و لا بيره و ربنا يحاسيبني لو كداب مش عشان كلام و انتوا متعرفينيش هاكدب بجد انا مش بشرب بس ده سوق و بيزنس و بعدين ماهي الأهرام للمشروبات كلها شغاله زي الحلاوه و لا هي لما جت في ساويرس بقت حرام؟؟؟؟
اشمعني يا قمر ماتكلمتيش علي مهرجان السيبنيما اللي شاله من اوله لآخره و لما بيطلب منه حاجه مبيتأخرش
قال لمني الشاذلي حبيبتك: انه لو تكليف فإنت اكيد مش بتكلميني علي وزير!!!!!! الله يا كبير ها ها ها ها ها مني يا حرام بلِمت و معرفتش ترد يا حرام و الله الجمله دي كيفيتني موت منه
نواره سامحيني ساويرس راجل وطني و محترم و مهتم بالبلد كفايه انه في ٧ او تمن سنين خلي موبينيل من اكبر تمن شركات موبيل في العلم اليس هذا انجاز وطني لمصر ! اه بيكسب فلوس من وراها ماشي بس اسم مصر موجود و هو مش بياخد المشروعات اللي في افغانستان و العراق بالجنسية الأمريكيه دي مناقصات دولية مفيهاش لعب دي مش تبع قطاع الأعمال العام،
و الله مش بدافع عنه عشان مسيحي لأ فيه زيه كتير مسلمين و مسيحيين زي الفل
بينكوا بقي موقف شخصي مثلاً موقفلك موبايلك مثلاً عشان مش دافعه الفاتوره ده موضوع تاني!!!! بتقولي انه طائفي هو قال انه مش بيهتم بموضوع مسلم و مسيحي عشان دي ارزاق و لما سأل عرف انه عنده ٩٠٪ من العماله مسلمين و هذا يُحاسب هو عليه و لست انا
نجيب ساويرس انجاز مصري قبطي (يعني مصري) مُشرف
و برضه هاتيجي تاكلي معانا كباب حتي لو الكلام مش عاجبك هه و انا مبسوط قوي انك تدخلتي في الحوار حتي
لو إختلفنا
يا عم عمرو حوش خالتك عني لحسن و الله اسيب المدونه دي ماهو اصلها ما صدقت لقت واحد مسيحي تنفض فيه
الحقوووووووووووووووووووني

AL-MASIHI-AL-MAGHOUL said...

مش اسمي بس اللي هايطلع ده كل حاجه هاتطلع ها ها ها ها منها ديني كمان
و بعدن هو في حد بيتنصر علي اكلة كباب اكيد لأ مش اقل من طرب و نيفه كده تبقي مشبوكه شويه ها ها ها
و الله انت شكلك من جيرسي سيتي و هاتبهدلنا

amr220 said...

لا انا مش في جيرسي ستي . . انا في حته كلها يهود
و من عاشر القوم اربعين يوم . . ههههه

يابني ما تسلم و تخلص بقه . . اصلك حتتباس يعني حتتباس
حندخلك الاوضه و نقفل عليك بالترباس يا عباس

و لو سمحت . . بالراحه علي خالتي
انا ماليش بركه الا هي

zenzana said...

عمرو
اياك تغلط انت مش عارف انا ممكن احجزك في الزنزانة وانت طبعا عارف ايه اللي ممكن يحصلك؟
يعني هتطلع بالكباب م اﻻخر


سي مسيحي مجهول
يا اللي معاشر القوم اخرتها برده انا اطلع مدونة فتنة طائفية ؟ طب لو جدع ادخل الزنزانة وانا هوريك اﻻضطهاد علي اصله ﻻن الزنزانة ملغمة اضطهاد للمسيحيين

بقولكم ايه انتوا هتفضلوا جوا البوست دا وخﻻص؟
طب وباقي اﻻبداعات ؟ وﻻ انتوا حتي مش ناويين تفرجونا علي ابداعاتكم؟
لو هتفضلوا هنا يبقي تدفعوا ارضية ﻻن عنوان البوست دا يحمل اسم العبدة لله

amr220 said...

هي الستات اللي هنا شريرين كده ليه
هو فيه ايه . . عمالين نجيب لكم كباب و ندلع فيكم و اخرها نترمي في الحبس

تعالي يا عم مسيحي مجهول نطلع من هنا
انا حروح افتح التلفاز و اقعد اتفرج علي زكريا بطرس اجدع

و بعدين نطلع من البوست ده نروح فين
دي كل المواضيع التانيه حاجه اخر كاءبه بالصلي عالنبي
حماس ضربت عباس
عمر اتحجز في القسم
قضيه هوايده طه اتاءجلت
و ده يساري و ده يميني
و واحد قدامي و اتنين علي شمالي
و واحد كان ماشي و اتكعبل وقع علي بوزه
قام طلع له دمل في قفاه
حط له مرهم تراميسين
قال له شكرا مش عايزين

ايه يا جدعان . . ما تخدوا يوم اجازه
و اضحكوا و فرفشوا . . و انشاءلله بكره ربنا يرزقنا بمصيبه حلوه كده
و نعمل لها بلوج جديد

AL-MASIHI-AL-MAGHOUL said...

شوفت بقي قعدة اليهود خليتك دماغ إزاي ياعم خليك قاعد هناك منه عامل دماغ و انا اوفر فلوس الكباب مدام الستات شادين علينا قوي كده
ابعتلي دعوة اجيلك ها ها ها ها

جبهة التهييس الشعبية said...

اوعي بقى يا زنزانة عشان انا مسقفة

وح اطلع البشلة دلوقت

فيه ايه كابتشن يا ذكوري

ايه حكاية الستات شريرين

اه احنا شريرين لك شوق في حاجة؟

المسيحي المجهول

هههههههههههه

ما تغير اسمك ده بتفكرني بلبنى عبد العزيز في فيلم المراة المجهولة

انا قلت ان المسيحيين هم اللي بيشربوا خمرة؟؟؟؟؟؟؟؟؟؟

انا ما اعرفش ولا مسيحي بيشرب خمرة

وكل اللي بيشربوا خمرة ساويرس مسلمين

يعني مسلمين شوية كده

المهم

انا اقصد انه زيه زي معظم رجال الاعمال المصريين

ما بيعملش مشاريع تنموية

خااااااااااااااااالص

وكل مشاريعه هو وغيره

مسلمين وللا مسيحيين بقى

كلهم مشاريعهم ربحية دبحية افسادية بالدرجة الاولى

انا مش شيوعية ومش ضد راس المال لما يبقى تنموي ووطني

لكن للاسف مافيش كده في مصر

ساويرس هو الوحيد في مصر اللي عنده عشرة مليار دولار اه

ده محطوط في القائمة مع زفت الطين بن طلال

انا مش باكرهه عشان دينه

:)

بس انت بتحبه عشان ايه؟؟؟؟؟؟؟؟؟؟؟؟؟؟؟؟؟؟؟؟؟؟؟؟

انا عموما مش باحب رجال الاعمال المصريين

مافيهمش واحد زي طلعت حرب

amr220 said...

السيد المسيحي المجهول
ابعت لي اسمك و عنوانك و انا ابعت لك دعوه
انا تحت امرك

من الحاجات اللي حلوه هنا . . انه محدش له دعوي بحد
و من غير الائق انه حد يكلمك في اي مواضيع دينيه
الدين هنا موضوع شخصي جدا و محدش عاوز حتي يناقشه
الدوله هنا مالهاش دعوي مين مسيحي و مين مسلم و مش حتلاقي اي ورقه رسميه او مش رسميه بتساءلك دينك ايه . . ماعدا لو دخلت مستشفي . . عشان لو ربنا افتكرك يبقوا يعرفوا يدفنوك في انو ناحيه
و ممنوع تدريس الدين في المدارس
و ممنوع مكبرات الصوت الخارجيه في اي دار عباده
و لو افترضنا انه حد ضايقك في دينك . . تجرجر امه في المحاكم و في خلال فتره قصيره حتاخد حقك . .
ملخص الموضوع . . مافيش حد لو دعوي بحد
تؤمن و لا تكفر
تتنصر و لا تسلم
ماعندهمش وقت للكلام ده

يا ريت نواره تفتح موضوع جديد للمناقشه
احنا و هما
مناقشه حره بين الشرق و الغرب

ايه رائيك يا زنزونه . . شوفي بادلعك ازاي؟

amr220 said...

اتفضل يا سيدي
نطلع من الحبس يقوموا يخباطونا بالبشله
طيب ليه ما يخباطوناش بي ورده . . و لا بفله . . و لا بياسمينه؟
لا و الله جنس فعلا لطيف
شاهد يا عم مسيحي مجهول
شايف العنف و الارهاب بيبتدي منين
الارهاب و الكباب

و بعدين احنا مالنا مين بيشرب خمره و مين بيشرب دوا الكحه
دع الخلق للخالق
تعالي خدي لك بؤ . . ده سبرتو مطهر اللامعاء . . . هههههههه

برضه اخرتها بشله يا عثل .. طب و النبي ابقي نشني عالقلب . . :)

AL-MASIHI-AL-MAGHOUL said...

يا نواره اييييييه
محمد علي مات و الثورة قامت و لا مجالكيش خبر!!!!! إسألي عم اجمد يقولك
طلعت حرب راح
و التلفزيون راح و الفديو راح و الصداع بنتاع المشاريع التنمويه ده بقا موضة قديمة
كل ايام و تدي إحكامها
قريت مره عند عم احمد مثل عجني قوي:
قالوا لجحا :إلحق بيت أبوك بيقع
قال: لما الحق أخدلي طوبه
ها ها ها ها ها ها
بُصي يا نواره انا مش من هواة الإشتراكية
و من اشد الكارهين لمن يدعون ان الثوره و الجمهوريه
هما طوق النجاه من الملكيه
لأ بقي ايام الملك كان الجنيه المصري يساوي جنيه دهب
فاهمه بعني ايه جنية دهب
النهارده الجنيه الدهب بكام!!!!!!؟؟؟؟
طبعاً متعرفيش عشان قشفورة زي حالاتي ولا عمرك شفتي الدهب اصلاً، بس اهو هانعمل ايه
كل ايام و تدي أحكامها
مش كده ولا ايييييييييييه
تحياتي

AL-MASIHI-AL-MAGHOUL said...

عموره
نواره تقطعك ببشله بمشرط
ماليش فيه
مسلمين في بعض اصطِفوا مع بعض
لو موِتوا بعض مصلحه ها ها ها ها
و بعدين انا مش قد نواره
لحسن يتصدرها عم احمد
يهبدني قصيده علي المسيحيين
لا هاقدر ارد ولا هاعرف اصلاً أرد
ده عمنا كلنا
انا هاروح آكل الكباب و سيبتيلكوا انتوا الإرهاب
سلام يا معلم

AL-MASIHI-AL-MAGHOUL said...
This comment has been removed by the author.
AL-MASIHI-AL-MAGHOUL said...

شايف يا عم السماحه
أمريكا عملت للمسلمين مِصليه في مطار جون كيندي
النهارده في الأهرام صفحه ٢
عملوا مصليه في صالة ٤ اللي بتطلع منها رحلات من امريكا للعالم الإسلامي
اهي امريكا ثبتت العالم اللي في المطار اهه اااااهه ايه رأيك
صدقني
تكبير الدماغ هو اللي واكل
و الدين لله و الوطن للجميع يجب ان يكون شعار المرحلة
و نموت نموت و يحيا سعد
سعد سعد يحيا سعد

amr220 said...

يابني ده شرف كبير انه زنزانه تحبسني و نواره تقطعني
ربنا يقدرني و اعرف ارد كل المشاعر الحلوه دي
دول بيحبوني . . موت
قد ايه انا محظوظ
ربنا يخليكوا ليا يا رب

amr220 said...

المسيحي المجهول

انتي يا عم عندك عقده اسمها امريكا؟
احنا مالنا يبنوا مصليه و لا يبنوا طبليه
يعني لو امريكا ظارطت . . احنا كمان لازم نظرط؟
لهم دينهم و لينا دينا
احنا يا عم مش عاوزين نبني كنايس
احنا حرين . . البلد بلدنا بقي و نبرطع زي ماحنا عايزين
اغلبيه ساحقه بقه

ههههههههههههههه

amr220 said...

انا باقدم استقالتي من البلوجات و المدونات

اطيب الاماني لنواره و زنزانه و اخويا المسيحي المجهول

جبهة التهييس الشعبية said...

ايه ده ايه ده؟

حد زعله في حاجة ده اللي بيقدم استقالته؟

وافرض يعني حد زعلك في حاجة تخلع كده

اخص ع الرجالة

amr220 said...

انتي عاوزه تبقي مع ناس بيحبوكي بصدق
يبقي تعبريهم

و لو كل اهتماماتك انك في الاخر تقولي اخص عالرجاله
برضه مش حاكسفك . . انا قلت لك قبل كده انك غاليه عندنا

اخص علي الرجاله ميت مره
مبسوطه؟ . . اكيد مبسوطه

تحياتي

جبهة التهييس الشعبية said...

:(

amr220 said...

بعتلك الاستقاله علي الميل


:)

zenzana said...

كدة برده يا عمر و؟
كدة برده يا سي مسيحي يا مجهول؟
طب مخصماكم انتوا الاتنين
وزعلانة منكم جدا
وانتوا الاتنين هتتحطوا حبس انفرادي سوا عشان تقطعوا بعض كويس

كل دا عشان تهربوا م العزومة ماشي
يا بخلا
كنت هعزمكم انا