Friday, June 15, 2007

بني سوافيا

جرنال المخبر اليوم نشر خبر عن اشتباكات بين مسلمين ومسيحيين
في بني سويف
طبعا المخبر اليوم حاطاها في سياق جزء من الاشتباكات الطائفية
بس اللي يقرا الخبر كويس
ح يلاقي انها حادثة عادية
واد سايق بسكلتة خبط طفلة الطفلة اغمن عليها
اهلها افتكروها ماتت شالوها وراحوا لبيت اهل الواد وزقلوه بالطوب
والغازية لازم تنزل
راحوا التانيين نازلين بالعصيان
وهرك هرك
الحادثة دي في الصعيد بالذات بتحصل بين المسلمين وبعض
والمسيحيين وبعض
لكن لجل بخت البلد دي الاسود
وعشان المخبر اليوم تصطاد في المية العكرا
طلعت بين مسلمين ومسيحيين
فيه احتقان صحيح
وفيه فتنة صحيح
وشكلها كده رايحة على سكة وحشة صحيح
احنا مش عايزين نحط راسنا في الرمل
ومش عايزين برضه نساوي بين المجني عليه اللي ما بيردش وبيتنازل عن المحاضر
وبين الجاني اللي فجأة كده بدون ادنى سبب يهجم ع الناس ويضربهم
لكن برضه مش عايزين نحمل الاحداث اكثر مما تحتمل
ومش عايزين نصرخ الذئب الذئب لحد ما نلاقي الناس مش مصدقانا
انا شايفة ان المخبر اليوم بتحرض على المسيحيين
وبتدفع في سكة الفتنة اللي هي موجودة بالفعل
وشايفة ان حل الفتنة
اننا نطرح كل شيء بصدق وبدون تهويل ولا تقليل
وبدون مساواة بين الجاني والمجني عليه
وبرضه بدون الشحاتة على المجني عليه وبقى
استحلفكم بالله ان تنظروا الى هذا الوجه الملائكي البريء
يعني في صفحة الحوادث حلاق قتل كهربائي باين
لو كان الحلاق مسلم والكهربائي مسيحي ح تبقى فتنة؟
احنا مش عايزين فرقعات اعلامية
ولا عايزين خياطة ع الجرح من غير ما يتنضف

2 comments:

ibnyosry said...

انا عايز ارد على نقطتين اتنين فى الموضوع ده ده طبعا غير أنى عايز أشكر الاستاذه الكبيرة على أهتمامها بهذة القضيه
اولا بخصوص موضوع الجريدة الى انقلبت على وشها سحفا خلف حذاء انظام
تلهث وتلحس
وانا راى الجريدة الى كده تقاطه لمخالفتها المعايير المهنيه وتجنبها للحياد الصحفى
النقطه التانيه نقطه النصارى والمسلمين
مش عايزين ندى المووضع ده اكبر من حقه
الفتنه نائمه لعن الله من أيقظها
ودمتم

جبهة التهييس الشعبية said...

لا يا احمد

الفتنة لا نايمة ولا حاجة

باين عليك انت اللي نايم

:)

انت مش دريان ان فيه ناس اعتدي عليهم في العياط وفي القباري وفي الدخيلة؟

ده اسمه ايه؟