أمي وأحمس والأنبا صموئيل

ماما كانت بتدرس في امريكا في الستينيات

بتقول لي انها لما كانت في امريكا

كانت بتدرس وبتشتغل في مركز الاعلام العربي

عشان تصرف على دراستها

وهي في اتحاد الطلبة العرب طبعا اتخانقت مع كل المديرين

بما فيهم سعد الدين ابراهيم

وشخطت فيه وقالت له انت مش عارف الفرق ما بين

السكرتيرة والشغالة

وبتقول لي انها كانت قرفانة قوي من كل العناصر اللي كانت بتشتغل هناك

عشان معظمهم كان في الاتحاد الاشتراكي وجايين يتجسسوا على المصريين

في امريكا

مافيش حد ماما كانت بتحترمه غير الدكتور احمس

اللي ساب بلده وجه يشتغل في مركز الإعلام العربي التابع للجامعة العربية

ساعي

ماما لما شافته اتخضت وكل ما يعدي

تقف له وتحييه: اهلا يا دكتور

وتبص للناس: ده الدكتور احمس

المهم الراجل طبعا تأثر من تقديرها ليه وعيط على كتفها وعرفها على مراته

اللي قالت لها انهم كانوا عايشين كويس في مصر وكانوا ساكنين في فيلا

وحالتهم ممتازة وهو اللي صمم يسافروا امريكا وباعوا اللي وراهم واللي قدامهم

عشان يروحوا الجنة الموعودة

هي وولادها لقوا شغل وهو ما لقاش غير ساعي في مركز الاعلام

واالمركز ده واضح انه قذر عشان يشغل دكتور شغلانة زي دي

ماما قالت لاحمس ما تروح لسابا باشا اللي بيشغل الاقباط

قال لها ما احبش ابقى تحت ايد حد وسابا ده كان في امريكا

بيشتم النظام وعبد الناصر وبيدعي ان عبد الناصر بيضطهد الاقباط

والشهادة لله عبد الناصر ما اضطهدش الاقباط

بالذات يعني

هو كان جو اضطهاد عام

المهم الراجل احمس ده واضح ان الهكسوس اكلوا له دماغه

ساب مراته وراح اتجوز واحدة امريكية

طلق مراته ازاي وهو ارثودكس

وازاي اتجوز واحدة تانية

ماما ما تعرفش بس تعرف انها صعبت عليها مراته اللي اطلقت في الغربة

وصاحبتها وفضلت معاها على طول

في يوم الست دي قالت لماما ده انا رايحة الكنيسة عشان يوم سبعة يناير

ماما قالت لها اجي معاكي

راحت بقى لقت الانبا صموئيل اللي بعد كده اتقتل مع السادات

وقعد يقول موعظة وماما تعيط

- اصل امي زيي كده بدمعة -

وبعدين صاحبتها قالت له: دي صافي ناز يا ابونا صوتها حلو قوي

وبتغني ترتيلة مريم البكر بتاعة فيروز

فالانبا صموئيل قال لها تعالي غني

ماما بقى غنتها وكل اللي في الكنيسة قعدوا يعيطوا

والانبا صموئيل قال لها: يابنتي الرب اداكي نعمة

صوت حلو ونفس طاهرة حافظي عليهم

وواحد من المهمين جالها على جنب وقال لها: كنت قاعد

متربص لك..لو كان صوتك طلع وحش وللا نشزتي

ما كنتش ح ارحمك

بس زي بعضه بقى طلع صوتك حلو

لما ماما رجعت وحكت للمرحوم فيليب جلاب

وقالت له انها حبت الانبا صموئيل

قال لها: ده امريكاني حقير

قالت له: وهو الانبا صموئيل المفروض يبقى شيوعي ليه

====

هو ينفع دلوقت واحدة مسلمة تحضر سبعة يناير وتغني كمان في الكنيسة؟