وعليه
فانا جالي كومنت ع المدونة التانية
انا شخصيا ليا رد عليه
بس بما اننا فتحنا الحوار
احب اننا نناقش النقطة دي
واللي بيتكلم فيها كتير من المسلمين
:اليكم التعليق
طايب نفترض ان الاقباط كانوا الاغلبيه وا المسلمين كانوا الاقليه, يعني كانو هياعدونا علي حجرهم وا يدلعونا و يغنولنا ماما زمانها جايه جايبه معاها شنطه فيها جوامع و حاجات؟ و ياتري كانو هيزعلوا لو فتحنا لهم محطه فضائيه تسب في المسيح ليل و نهار؟ و يا تري يضايقهم اننا نفتح غرف عل بال توك كل مهمتها انها تشككهوم في دينهم؟؟؟ يا تري كانو حيمسيكونا امن الدوله و المخابرات و مجلس الشعب؟ زي الامريكان كده ما ادو كل المناصب الهامه ل السته مليون مسلم اللي في امريكا؟؟؟ متبطلوا سماجه و غتاته بائه
========
ردوا بقى يا مسيحيين مصر
بالنسبة لي
انا عندي بوست ح اكتبه ارد بيه ع الكلام ده
بس انتوا ايه ردكوا
وليه مش شايفين الاضطهاد اللي بيتعرض له المسلمين
في كل الدول العلمانية المسيحية الاصل
دول عملوا مظاهرة في استراليا بالبكيني قدام الجوامع
ده غير اننا مش بنلبس اللي احنا عايزينه هناك
وما عندناش مشاركة لا سياسية ولا اقتصادية
زي المتوفرة للمسيحيين في مصر
بالعربي
واللي الاخ عايز يقوله
احوال المسيحيين في مصر
احسن من احوال المسلمين في امريكا واوروبا
اما بخصوص الاعتداءات
فده بيحصل
وللمسلمين النصيب الاكبر منه عالميا
===
ملحوظة انا باوضح رأيه
رأيي انا ح اكتبه في بوست
بس فعلا عايزة اسمع رد المسيحيين
4 comments:
يااااااه
دانا كنت بسأل نفسى هوه ليه السؤال ده محدش سأله من بدرى
و من الاول أحب أوضح إن انا مسلم، و بحب دينى كمان علشان أى حد عايز يزايد على النقطة دى، ميفكرش فيها اصلا
طيب أنا حعلق على البوست ده على نقطتين.
الاولى لو المسيحيين هما الأغلبية، وبقوا عاملين زى المسلمين دلوقتى، يعنى بالبلدى نقلب الادوار. إحنا بقى كمسلمين ساعتها حنكون حاسين بإيه؟ يعنى حنبقى مبسوطين و راضيين، ولا المفروض إن إحنا نبوس إيدينا وش و ضهر على إن المسيجيين كرماء قوى معانا و مديينا شوية حقوق.
ولا المفروض نعمل إيه؟
طيب لو حسينا إن إحنا فيه بعض الحقوق نقصانا، المفروض نعمل إيه، نتكلم ولا نحط الجزمة فى بقنا؟
طيب مش أكيد حيكون فيه ناس بتفكر إن إحنا مضطهدين برضة و تعمل غرف فى البالتوك و قنوات تلفزيون بتشتم فى المسيحية (قال يعنى مفيش دلوقتى)طيب ساعتها ح يبقى اللى بيعمله المسيحيين ده صح ولا غلط
يا أخ ياللى كاتب التعليق اللى بقى بوست ده، المشكلة مش فى أن لو قلبنا الموضوع هما برضه هيعملوا كده فينا، هيه الفكرة كلها إيه هوه الصح اللى مفروض يتعمل.
النقطة مش فى قلب الأدوار، لأن إحنا الأغلبية فى الموقف ده غلطانة، و أكيد لو قلبنا الأدوار، حتكون الأغلبية اللى فى الموقف ده ساعتها حتكون غلطانة، الغلط فى الموقف نفسه مش فى الناس اللى واخده الموقف
النقطة التانية، مين قال إن المسلمين مضطهدين فى الغرب؟ انا حتكلم عن تجربة شخصية، انا شايف إن لغاية دلوقتى الإسلام مش مضطهد من الغرب
لو رجعنا بالذاكرة شوية، حنلاقى إن الدين الإسلامى كان اكتر دين بينتشر فى العالم، و تحديدا فى اوروبا و أمريكا. وصورة المسلم كانت فى منتهى الحيادية فى الغالب، بل إجابية فى الأعم
اللى حصل إن بعد أحداث سبتمبر فى أمريكا، نجحت أمريكا فى تصدير فكرة إن الإسلام دين عنف و فى مجتمعات الغربية، وسائل الإعلام مؤثرة بشكل جامد و هيه اللى بتشكل فكر الناس.
بقت صورة الإسلام مهتزة ليه؟ علشان هما إستغلوا الموقف اللى حصل ولا علشان الموقف اللى حصل؟
اكيد علشان الموقف اللى حصل، و اللى إتاكد بعد كده باللى حصل فى مدريد و لندن، و الفيديوهات الرائعة اللى كان بيطلع فيها المجاهدين و بيقطعوا رقبة الرهائن على الهوا.
طيب معلش، نخلينا مكان واحد مش مسلم محايد و شاف الفيديوهات و التفجيرات دى، حيفكر في الإسلام إزاى؟
يبقى اكيد لعد الاحداث دى حيبقى فيه خوف من الإسلام للى مش عارفة، و تحفز للإسلام للى بيكرهه.
و مع ذلك، ح تلاقى إن المسلمين مش مضطهدين، هما ممكن بقى بيضييق عليه فى حاجات كتير، بس ما وصلتش للإضطهاد.
أنا سافرت نيو يورك، قبل أحداث سبتمبر و بعدها، لم أحس بفارق شاسع فى المعاملة، أكيد كان فيه فرق، و أكيد اللى كان عامل الفرق ده، إحساسى بالتأهب و التحفز لمواجهة أى رد فعل على إنى مسلم، و ملقتش أى رد فعل بصراحة، بالعكس الناس فاهمة و واعية ، بل انا صليت فى مساجد و مراكز إسلامية ، و أحيانا فى مساجد فى بير السلم زى مصر.
معلش يبقى ما ينفعش نقول إضطهاد زاد، ينفع نقول مضايقات زادت
طيب مثلا، موضوع الحجاب فى فرنسا اللى إتمنع فى المدارس و أخد اكبر من حجمه و بقى موضوع إضطهاد للمسلمين و دى من ضمن حرية الناس إنها تلبس اللى هيه عايزاه، طيب محدش من اوروبا ولا أمريكا طلع و عمل حملة بالقوة دى و مظاهرات علشان ممنوع الستات تمشى فى السعوطية مثلا من غير نقاب، مش بس حجاب، ده من غير محرم كمان، مش ده برضه نفس المثال؟ ده يمكن السعودية أنقح. لأن فى فرنسا كان فى المدارس بس
طيب بلاش السعودية،إيران مثلا، ماهو الستات ممنوعة تمشى فى الشارع من غير شادور، مسلمة بقى مسيحية، مش فارقة، بس ما شوفناش يعنى مظاهرات فى الغرب بتندد بالحملة الشعواء و إضطهاد المسيحيين فى الدول دى، مع إنها نفس النقطة
طيب ماهو ممنوع إن أى حد مش مسلم يدخل مكة مثلا، تخيل بقى لو بقى ممنوع إن المسلمين يدخلوا، مش حقول روما، و لكن الفاتيكان بس، حيبقى ده إضطهاد هناك و عندنا لأ؟
و بعدين، نفرض إن الغرب وحشين و كخه و بيضطهدوا المسلمين، المفروض إحنا فى المقابل نضطهد المسيحيين عندنا، بنرد فيهم يعنى؟
الموضوع كله إن إحنا عندنا قطاع كبير من المواطنين حاسين إنهم مش واخدين الحد الادنى لحقوقهم، يبقى ندور إزاى ياخدوا الحد الادنى لحقوقهم، مندورش بقى على مقارنات و حاجات زى كده،
تعليق طويل عريض اهوه
المفروض كان يتعمل بوست و الله
:))
بس المفروض إن البلوج ده مش بلوج بوستات، ده بلوج مشاركة علشان نوصل لصيغة مريحة لينا كلنا كمواطنين فى البلد دى
انت بتقول فيها
انا ح احطه بوست فعلا
ليه الاقباط وضعهم مختلف؟ همامش اقليه زي المسلمين في امريكا و اروبا؟ و بعدين مش هما الاقباط اللي عاوزين ديمقراطيه زي بتاعه امريكا؟ اومال بيشتكونا لامريكا ليه؟ طيب و امريكا فيها كام عضو مجلس شعب مسلم؟ واحد يا حسره و مطلعين روحه
و كام عضو مجلس شوري؟ مفيش
و كام وزير؟ مفيش
طايب كام مسلم في وظيفه قياديه في البوليس او ال اف بي اي او ال سي اي ايه؟ برضه مفيش
طيب ليه الدنيا اتقلبت في فرنسا السنه اللي فاتت لما المسلمين حصلوا علي تصريح بناء جامع في مدينه تولوز الفرنسيه مع العلم ان المسلمين في فرنسا هم %10 و انتهت القضيه بسحب الترخيص
و ايه حكايه منع المحجبات من دخول المدارس و الجامعات في اوربا؟ دواعي امنيه؟
يالا ما علينا
طيب فين الدوله الحلوة دي اللي الاقليه فيها بتحكم الاغلبيه؟
انا معنديش مشكله ان الاقباط يبنوا كنايس او يطالبوا بحقوقهم .. و ياخدوها كامله متكاملة . . حلوة متمكاملة دي . . هههههه . . . بس انا مش موافق علي قله الادب و السفاله اللي بشوفهم بيعملوها في الخارج زي علي سبيل المثال ابوهم زكريا بقلظ لما يطلع في التلفزيون و يهددنا ان امريكا حتضربنا بالصواريخ . . او الاستاذ مايكل منير اللي لسانه نشف و هو بيطالب بقطع المعونه الامريكيه عن مصر . . اقول ايه و لا ايه . . انا في العادة بحتفظ براءيي لنفسي . . بس الست نواره دي غاليه علينا قوي . . و تحياتي و حبي للجميع
الاستاذ اللي سايب ميله
يا جماعة انتم ليه مش شايفين ان الموضوع اكبر من مسلمين ومسيحيين ؟ طوال عمر المسلمين والمسيحيين عايشيين مع بعضهم فى سلام ومحبة وئام حتى انهم تعايشوا كمان فى الماضى مع اليهود وكان كل واحد فيهم بياخد بيد الاخر ويساعده بل ويأتمنه على ماله وعياله مين اللى قام بالثورة مش هم المسيحيين والمسلمين وكانوا ماسكين بأيادى بعضهم البعض؟ مين اللى حرر مصر مش العسكرى المسلم والمسيحى فى حرب لأكتوبر 73 يا ناس لازم ننتبه الى ان الحاكية اكبر بكتير من الحرب بين المسلم والمسيحى فما طول عمرهم وجهيين لعملة واحدة اسألوا انفسكم لماذا الان ؟ وما الدافع لكل هذا ؟ اسألوا انفسكم من المسؤل اللى من مصلحته قلب نظام المصريين واحوال البلد وياريب بلاش الافكار البيزانظية وحكاية اليهود وامريكا وبلاش نعلق كل حاجة على الشماعة الامريكية لاننا كلنا نعلم من اللى له المصلحة فى تغييب عقولنا وتحويل مسارها عن التفكر فى اوالنا ومستقبلنا والمطالبة بحقوقنا المنهوبة النهاردة الوضع اختلف وكان لازم الرؤية تختلف وكان لازم التعتيم والتغييب الاعلامى عشان الشعب ينشغل فى التفكر فى امروه يا جماعة تعالوا معاً نتحد ونتفكر سويا فى انفسنا ليس كأفراد مجتمع واحد فقط بل كإنسان واحد يعيش فى عالم واحد ويبلد واحد المصلحة واحدة فى كلا الجانبين تعالوا نتحد فى الوحدة الفلاح والنجاح تعالوا نقابل احزاننا ومشاكلنا بمنتهى المحبة ونتواضع كلنا لبعض ونتستمع بعض ونتقبل بعضنا البعض دون اللجوء للحيل القذة التى يتعمد بعض الناس ان يظهروها على اسطح حياتنا ومشاكلنا اليومية تعالوا نعمل زى اجدادنا اللى فهمو الحقيقة صح وتعاونا ففلحوا
ادعوا الجميع على تفتيح العقول وايضاح الرؤية لمعرفة الحبيب من العدو العدوا مش من خارج بلادنا العدوا مننا فينا يا خلق افيقوا واستفيقوا
Post a Comment